Búginginiń bas taqyryby dinı radıkalızm, ýahhabızm-salafızmmen kúres bolyp otyr. Jer-jerlerde radıkaldy aǵymdarǵa tyıym salý, olarmen kúresti kúsheıtý týraly kóp aıtylýda. Osy eldiń bir azamaty retinde bul máselege qatysty meniń de aıtarym bar.
Dinı aǵymdar, túrli radıkaldyq uıymdarǵa birinshiden belgili bir ıdeıa ózek bolsa, ekinshiden ondaı aǵymdardyń qyzmeti qyrýar qarjyǵa negizdeledi. Memleket qolda bar múmkindikteri, zań arqyly ondaı teris aǵymdardyń tek qarjy kózderin jaýyp, túrli kitaptaryn tárkileýi múmkin. Iaǵnı, materıaldyq qundylyqtaryna ǵana shekteý qoıa alady. Al, ıdeogologıasymen qalaı kúresedi? Adamdardyń sóıleýine tyıym salǵanmen, oılaýyna tosqaýyl qoıa almaımyz ǵoı. Sondyqtan, bul baǵytta basqasha jumys, basqasha áreket kerek.
90-jyldary rekıt, bandıt bolyp kúneltken nebir qaraqshylar zaman túzelgende bılikti, ákim-qaralardy jaǵalap, ózderin qýǵyn-súrginnen aman saqtap qalǵanyn bilemiz. Tek aman qalyp qoımaı, keshegi qylmys áleminiń serkeleriniń birazy búginde saıasatta da serke bolyp júrgeni eshkimge jasyryn emes. Kisi óltirip, jalǵan qujat jasaǵan, atyn ózgertip, qylmysyn jasyrǵan qandyqoldyń «Nur Otan» partıasyna ótip, depýtat bolǵanyn da kóz kórdi. Sol sıaqty rýhanı saladaǵy bos keńistikti «toltyrýǵa» kelgen teris aǵym jetekshileri men ustanýshylary da zań kúshine mine bastaǵanda bılikti jaǵalap, bir-bir sheneýnikti tóńirektep, ózderiniń «legıtımdiligin» kúsheıtýge tyrysty. Ol oılary júzege asty da. Búginde bar qazaqty alańdatyp otyrǵan, beıbit kúnde oq atyp, eldiń ishin ala taıdaı búldirgen ýahhabızm-salafızmdi ashyq qoldaıtyn, barlyq dinı tanym-túsinigi sol ıdeologıaǵa negizdelgen azamattar sondaı oımen oblys, respýblıka kólemindegi beldi-beldi uıym, mekemelerdi tóńirektep júr. Ondaılar bılik partıasy, bas partıa sanalatyn «Nur Otanda» kezdespeıdi dep senimdi túrde aıta almaımyz.
Partıa jetekshiligine kelgen Muhtar Abraruly kóp jerde sandyq kórsetkishterge ǵana mán berilgen keıbir kemshilikterdi túzeýge shamasy jetetin tulǵa. Tipti, partıa jetekshiligine osy ýaqytqa deıin saılanǵan saıasatkerlerdiń ishinde shoqtyǵy bıik azamat desek te artyq bolmaıdy. Partıalyq jumystan bólek, memlekettik hatshy, mınıstr, prezıdent keńesshisi bolǵan tájirıbeli sheneýnik qana emes, qazaqtyń janyn túsinetin, arǵy-bergi tarıhynan habardar tulǵa.
Bıyl maýsym aıynda batys óńirlerdi aralaǵan Muhtar Qul-Muhammed óziniń dinnen de, arab ǵylym-biliminen de habardar jan ekenin ańǵartyp, jarty álemge qaýip tóndirip otyrǵan ýahhabızm-salafızm ıdeologıasyn synǵa alǵan bolatyn. «Partıa jetekshileri tek saılaý men arzan abyroıdy oılaıdy» dep kelgen basymyz Muhańnyń mundaı batyl málimdemelerine ishimiz jylyp sala berdi. Muhańnyń sol qasıetteri eldegi negizgi saıası kúshtiń jumysyn jandandyrýǵa, partıa belsendilerimen tárbıe jumysyn júrgizýge, sol arqyly sanǵa emes, sapaǵa mán berip, uıym qyzmetkerleriniń ıdeoogıalyq ustanymdarynyń durys qalyptasýyna yqpal etedi degen senimdemiz.
Elbasynyń tapsyrmasymen lańkestikke, radıkaldyq uıymdar qyzmetine qarsy qam-qareketti belgileıtin jeti zań jobasynyń ázirlengenin, jaqyn kúnderi parlamentke joldanatynyn estidik. Qaýipti ıdeıalarmen kúres onymen tyıylmaýy tıis. Turaqtylyqty buzýǵa nıetti aramzalar beıbit ómir keship jatqan el ishinde de, myń qubylǵan saıasat sahnasynda da joq emes. Sondyqtan, «Nur Otan» da bul iske bilek sybana kirisip, jer-jerlerde teris aǵymdarǵa búıregi buratyn, reti kelse solardyń sózin sóıleýge daıyn turatyn «belsendilerdiń» óz qataryna enip ketpeýin qarastyrýy, senim sergeldeńine túsken músheler bolsa, partıanyń qurylymdyq múmkindigin paıdalanyp olardy alastaýdyń amalyn jasaýy qajet. Óıtkeni, túrli saıası ıntrıgalar men astyrtyn oıyndardan bıik turatyn Elbasy partıasy eldi aldaǵan dúmsheler men alaıaqtardan ada bolýy tıis.
Jastilek Rahmet
