Atyraýda nodýlárly dermatıtten ólgen maldyń ıelerine ótemaqy tólenetin boldy. Bul maqsatqa respýblıkalyq búdjetten 120 mln teńge bólingen. Al bir maldyń quny qansha turatynyn mamandar áli de esepteý ústinde. Bul týraly Aýyl sharýashylyǵy mınıstirliginde ótken shuǵyl jıynda málim boldy, - dep habarlaıdy Qamshy.kz Astana arnasyna silteme jasap.
Eske salaıyq, indet saldarynan tek Qurmanǵazy aýdanyndaǵy 16 eldi mekende 695 iri qar mal qyrylǵan edi. Al, 4920 bas malǵa sımptomdyq emdeý sharalary júrgizilip, nátıjesinde 2086 bas iri qara emdelgen. Mamandardyń sózinshe, qazir malǵa tıisti egý sharalary jasalyp keledi. Degenmen áý basta maldyń qandaı dertke ushyraǵanyn bilmeı, ýaqyt ozdyryp alǵandyqtaryn da jasyrmady. Saldarynan mal arasyndaǵy indet aıtarlyqtaı asqynyp, 27 shildeden bastap óńirde karantın jarıalanǵan bolatyn.
Bizde daıyndyq shamaly boldy. Qazir biz daıyndyq jumystaryn júrgizip jatyrmyz. Qazir osy 4 aýdanda osy aýyrý ıelerine sol tártip boıynsha aqsha tólenedi. Ózimiz aqyldasqan soń, sol aqsha tólenedi, ári ketse 1 aıdyń ishinde, - deıdi QR Aýyl sharýashylyǵy mınıstrligi veterınarlyq baqylaý tóraǵasy Saqtash Hasenov.
Aýrý kórshiles Reseıdiń Astrahan oblysy aýmaǵynan kelgen bolýy yqtımal. Dert masa, shybyn sekildli jándikter arqyly juqqan degen boljam bar. Muny Reseı mamandary da rastaǵan. Al veterınar mamandardyń aıtýynsha, bul aýrýdan aıyqqan mal bolashaqta tóldemeıdi. Súti de aıtarlyqtaı azaıyp, salmaǵy burynǵymen salystyrǵanda jeńildep qalýy múmkin.
