Ońtústik Qazaqstanda jańa oqý jyly oqys oqıǵamen bastaldy. Saıram aýdanynyń ortalyǵy - Aqsýkentte oqýshylar atysqan. Keıbir aqparat kózderi qarýdan oq atyldy dese, basqa kýágerler oqýshylardyń bir-birimen taspen atysqanyn aıtady. Basy jarylǵan bir bala aýrýhanaǵa jetkizildi, - dep habarlaıdy Qamshy.kz 31 arnaǵa silteme jasap.
Saıram aýdanynyń ortalyǵy Aqsýkent eldimekeninde eki topqa bólingen mektep oqýshylary bir-birimen qaqtyǵysqan. Kórgen kýágerler oqýshylardyń bir-birine tas laqtyryp, atysqanyn rastaǵan. Tipti, Sáken Seıfýllın mektebiniń 11 «v» synyp oqýshysy Nurlan Bekbaev tas tıgen soqqydan basy jarylyp, jedel járdemmen aýrýhanaǵa jetkizilgen.
ABDÝJALIL OSMANOV, Saıram aýdany emhanasynyń hırýrg-travmotolog dárigeri:
- Bas mıynyń shaıqalýy bar. Basynyń shashty tusynda jarylǵan, syrylǵan jaraqattar. Alǵashqy kómek kórsetildi. Em taǵaıyndaldy. Jaraǵa alǵashqy hırýrgıalyq kómek berildi.
Mektep tóńireginde Nurlan Bekbaevqa tas emes, oq tıdi degen qaýeset te aıtylyp qalýda. Alaıda, onyń anasy Jumaǵazy Bekbaeva ulymnyń jarasyn tańýǵa apara jatyrmyn dep, suhbat bermedi. Al kórgen kýágerler bolsa, oqýshylar tas atysty deıdi.
- Atys bolǵan joq. Tek aıǵaılasyp, qyrylyp tóbeleskeni bolmasa...
- Tóbeles boldy.
Mektep men bilim bólimindegiler oq atyldy degendi qaýesetke balap otyr. Tipti oqýshylar tóbelesti degendi de jumsartyp, oınap júrip basy jarylypty deıdi.
JOMART BEKTASOV, Saıram aýdandyq bilim bóliminiń ádiskeri:
- Bireýi jyǵylyp basy jarylǵan. Odan keıin mektep ákimshiligi jedel járdem qyzmetin shaqyrǵan. İshki ister qyzmetkerleri ol eki oqýshyny ata-anasymen ishki ister bólimine shaqyryp, túsiniktemeler alǵan.
Nurlan Bekbaevpen birge oınap jatqanymda, aıaǵy súrinip, basy jaryldy deıdi Dýlat Batyrbekov. Sózin senimsiz jetkizdi. Onyń ústine ekeýi eki synyptyń oqýshylary eken. Oqıǵanyń naqty qalaı bolǵanyn quzyrly oryndaǵylardyń enshisine qaldyrdyq. Alaıda olar da búgin únsiz. Saıram aýdandyq polısıa basqarmasyndaǵylar basshylyqtan eshqaısysy joq dep shyǵaryp saldy. Oblystyq İshki ister departamentine bergen hatymyz da jaýapsyz.
