Men orazadamyn

Oraza – (jamandyqtan saqtaıtyn) Qaqpa

Hadısten

Oraza tutam, asyǵa kútkem bul aıdy,

Ramazannyń ár kúni  nurly, shyraıly.

Arylam endi pendelikterden  boıdaǵy,

Tazartam, qýam qandaǵy-saıtan  kúná-oıdy.

Tartynam astan, túzelem beıpil sózden de,

Tıylam jónsiz suqtana qarar  suq kózden de.

Qulshylyq jasap jınaımyn saýap-sybaǵa,

Qorǵanyshym sol  qıamettegi –Bezbende.

Syrt  berem ǵaıbat,  ósek-aıańnan, haramnan,

Qasyma endi jýysa almaıdy qaraý jan.

Bes ýaqyt Namaz, Alladan medet tileımin,

Shapaǵatymen bergeı dep Allam,   adaldan.

Barǵa da joqqa sabyr etemin, shúkir dep,

Erneýden asar meıirim-sezim shúpildep.

Imannan qorǵan soǵamyn, jýyp kúnámdy,

Kóńildiń shuryq-tesik jerlerin bútindep.

Aǵaıyndarǵa  ashamyn qushaq jat bolǵan,

(Ózimdi-ózim tejeımin  ishi kek tolǵan).

 Alladan tilep amandyq, sosyn Táýba etem,

Júzderin kórip marqaıǵan ári shattanǵan.

Bozala tańnan oıanam, sári ishýge,

Appaq bir álem kóregenim kileń túsimde.

Oraza tutam,  tózem ashtyqqa, shólge de,

Bar menen joqtyń qadirin bile túsýge.

Oraza tutam, nyǵmeti úshin Allanyń,

Jaratqan Iem, qýat ber, kúsh ber, qoldaǵyn.

Bes kúndik pánı óte de shyǵar qas-qaǵym,

Máńgilik deıtin mekenge barar joldamyn.

Jaqsylyq tilep jolyqqan jannyń bárine,

Músápirlerdi demeımin qarap álime.

Oraza tutam, Alladan tilek tileımin,

Násip qylǵaı dep aq jolyn jurttyń bárine.

Tirliktiń óri, eńisi  bolar,  qıasy,

Pendeńniń az ba pánı de jasar kúnási.

Oraza tutam, asylyq etpeý úshin de,

Allanyń bergen nyǵmeti,  ǵajap syı osy.

Saýaptan jazǵaı pendeńniń osy qadamyn,

Ramazan bul – Allama taıaý baramyn.

Aǵaıyn,  keıde  ashýyń kelse jıa tur,

Alla úshin aýyz bekitkem, orazadamyn...

Zeket týraly jyr nemese aýqattylarǵa aıtylar naz

Álhamdýllah álimsaqtan musylmanbyz ımandy,

Mal-múlikten artyq qoıǵan, ıman-saýap jıǵandy.

Shyn –kóńilmen qýanta alsaq, muńǵa batqan bir jandy,

Kóńilimiz kóktem bolyp,  júregimiz nurlandy.

Álhamdýllah musylmanbyz, Paıǵambardyń úmbeti,

Bul Jalǵanyń túnek bolsa, jaryq bolar bir beti.

Quranymyz – qolymyzda, jolymyzda – súnneti,

Bes paryzy – pendesine Jaratqannyń nyǵmeti.

Qıamettiń kúnine sen, Oraza usta, Zeket ber,

Namaz oqy, Qajyǵa bar, Allam ózi jetekter.

Duǵa jasap, tilek tile, Jaratqanǵa jalbaryn,

Pendelikten bıik tursań,  kidirte almas bógetter.

Myń san alǵys Iemizge, mal bitirgen basyńa,

Artyqpyn dep ózgelerden, isip-keýip tasyma.

«Bar álemdi bir tarynyń qaýyzyna syıǵyzǵan»,

 Saǵan degen peıiliniń túskendigi osy da.

Ras bolar, pysyqtaýsyń, ótimdisiń ózgeden,

Birdi-ekige, ekini-tórt jasaı bildiń sózbenen.

Tabandysyń, qýlyǵyń bar ańqaýdy aldap ketetin,

Aqsha tabý qalaı bolsyn,  maqsatyń  bul  kózdegen.

Tórt qubylań túgeldengen, búginginiń myrzasy,

Nar kótermes ataq-dańqqa bólenip tur bir basyń.

Baı bolý da Alla isi, kim bolǵysy kelmeıdi,

Qıamette teńsher bárin, tarazylar Kir tasy.

Baılarǵa artyq bir nyǵmet –  Zeket berý paryzy,

Baılyǵyńda bar deıdi Alla, kedeılerdiń qaryzy.

Bólis artyq dúnıeńnen,  qyryqtan bir bóligin,

Aqyrette kenish bolyp qarsylaıdy tárizi.

Zeketińdi miskinge ber,  joq-jitikke túgi joq,

Boryshkerdiń qaryzyn jap,  bir basynda muńy kóp.

Ia bolmasa quldy azat et, qýant jetim-jesirdi,

O dúnıede qorǵanyń sol, qoldar Ień Qudiret.

Zeket berseń tazalanar qorańdaǵy mal-múlkiń,

Jomarttyǵyń rızyq bop qaıta oralar árbir kún.

Pále-jala, aýrý-syrqaý,  apattardan saqtaıdy,

Aman-esen, saý júrgeniń saýapy isiń,  ol múmkin.

Arylasyń  ózimshildik, sarańdyq jat qylyqtan,

Táýbańa kep «shúkir» deısiń pendelikpen umytqan.

Júregiń de tynyshtalar, kóńiliń de jaılanyp,

Bir ǵajaıyp sezim baýrar,  jan-dúnıeńdi jylytqan.

Túsinesiń  «qoldyń kirin»,  kete almasyn asyp túk,

Bes paryzy-jan baılyǵyń, bir Allaǵa ǵashyqtyq,

Jaratqanǵa ǵıbadat qyp, adaldan mal jınasań,

Urpaǵyńnyń – urpaǵyna buıyrady Násip qyp... 

Múmin

Eger Múmin bolsańdar, Allaǵa jene onyń Paıǵambaryna boı uryńdar. «Enfal» súresi 1 aıat

Senerim de bir Alla, súıenerim sol taǵy,

Álhamdýlla  sabyrmen shýaqtanar  ár tańy.

Eńkeıgenge eńkeıer, shalqaıǵanǵa shalqaıar,

Tek   Allamnyń qahary – bul  pendeniń qorqary.

Tabynarym bir Alla, máńgilikke qulymyn,

Paıǵambardyń úmbeti, pendesiniń birimin.

Bul bes kúndik jalǵanda, bes paryzyn, súnnetin,

Tirek etkem janyma Ábý-Hanafı ilimin.

Óz-ózimnen qysylam aǵat ádet-qylyqtan,

Bárin Allam kórip tur, zaý bıikten, umytpan.

Kir jýytpan ımanǵa,  amalyna  adalmyn,     

Alpys eki tamyrǵa qan júgirtip, jylytqan.

Aqyretke senemin, taǵdyryma «shúkir» dep,

Taǵzym etem Allama, júrgenime « bútin» bop.

Quran oqyp jol tabam, aılasynan saıtannyń,

Bas ıemin sájdeme júrek shirkin lúpildep.

Jaratýshysy álemniń, qudiretine bas uram,

Qupıasyn bilsem dep, pendelikpen asyǵam.

Jeti qat kók,  jumyr Jer,  muz búrkengen zańǵarlar,

Tepe-teńdik, sheksizdik, aqyl jetpes osyǵan.

Ǵajaıypqa osynaý  «bas aýyrtqan» san dana,

Qupıasyn izdegen, sheshe almaǵan sonda da.

Qasıetti Qurannan aqıqatyn  uǵynyp,

Lá ıllaha ıllalah  Múmin bolǵan Allaǵa.

Múmin bolǵan Allaǵa kúlli adamzat balasy,

İbilis jolyn tańdaıdy, pendeniń keı «alasy».

Tań atady, kesh batyp,  shuǵylaly Aı, juldyzdar,

Aýysady retpen ǵalamat qoı qarashy.

Qudiretimen Allanyń jaratylsa pendesi,

«Qudaısynyp» kún kesher keıbireýler nege, osy?!

Aqyrettiń bolaryn aıtyp turǵan joq pa anaý,

Qazyǵurttyń basynda Nuq paıǵymbar kemesi.

Aqıqatqa bastaıtyn temirqazyq – Quranym,

 Amanatqa Jan bergen  uly Alla – Rabbym.

Din – Islam, múmınmin, Jaratqanan surarym,

Máńgiliktik mekenim – Jannat bolǵaı turaǵym.

                                         Namaz

 «Iman saqtaýǵa – qoryqpas júrek, aınymas kóńil, bosamas býyn kerek» Abaı

  Júr baýyrym meshitke, bas uralyq sájdege,

Arylaıyq kúnádan,  pendeligim az deme.

Syn-synaqta aqyrǵy, qıametten ap shyǵar,

  Imanyna kámildik, saýapty ister  ózge de.

Jasalyq ta  qulshylyq,  jaqyndalyq Allaǵa,

Bar ǵalamdy ýysta ustap turǵan sol ǵana.

Bul jalǵanda bes kúndik lastandyq, kirledik,

Bes  paryzdy oryndap, kelelik biz Taýbaǵa...

Asyǵaıyq Namazǵa,   jasaıyq  biz  qulshylyq,

Aqyretti oılalyq,  aldamasyn Tirshilik.

Qabirimiz – tar laqat,  jabylǵanda  esigi,

Ah urmalyq ókinip,  júrgenmen qur  dúrsinip.

Tıylaıyq kúnádan,  qam jasalyq erteńge,

Qıa bassań Allanyń aldaspany   jelkeńde.

Arsyzdyqtan ada eter, janyń ǵajap jaı tabar,

Qalqanyń  da  bul Namaz, tozaq oty – órterde.

Kir-tozańnan alastar,  aıyqtyrar dertińnen,

Rýhyńnyń azyǵy ol, adastyrmas sertińnen.

Amanaty   Allanyń keýdeńdegi  janyńdy,

Tapsyrarda tilińdi kálımaǵa keltirgen.

Rızyǵyń molaıar, bereke ener isińe,

Ǵajap ǵumyr keshesiń kirmegen bir túsińe.

Bar pendeni súıesiń, til-diline bólmesten,

Jaratqannyń quldaryn,  jasy úlken be, kishi me.

Perishteler ıyǵyńda, saıtan qashar qabaryp,

Alpys eki tamyryń  búlkildeıdi jańaryp.

Qudireti Allanyń,  janyń tabar rahat,

Boıyńdaǵy úreı men beımazalyq joǵalyp.

Shúkir, sabyr, qanaǵat, jaqsylyqqa nıet keń,

Bar álemge qaraısyń adal, ǵashyq júrekpen.

Bas qoıasyń sájdege,  Rýhtanyp turasyń,

Jaratqannan qutqar dep bar qaýymdy túnekten.

Solaı dostym, Meshitte bar ǵalamnyń baılyǵy,

Paıǵambardyń úmbeti, sap túzeıdi aıbyny.

Máńgiliktiń aldyńnan shýaq shashar Aı, Nury.

Keń qushaǵyn ózińe Jaratqan da jaıdy uly.

Júr baýyrym,  Meshitke, dáretińdi al, ǵusyldan,

Jaratqanǵa myń alǵys, júrekke nur usynǵan.

Quldarymyz –  Allanyń, Paıǵambardyń  –    úmbeti,

Lá ıláhá ıllallah ... álimsaqtan musylman...

  Qajylyq

Musylmannyń bir paryzy –  Qajylyq,

Paıǵambardan bergi ýájip – áz Ulyq.

Jolǵa shyqsań Mekke jaqty betke alyp,

Shattanarsyń , sheksiz saýap jazylyp.

Bar tilegiń qabyl bolar suraǵan,

Arylarsyń pendelikten,  kúnádan.

Janattasyń  o dúnıede, Pánıde,

Jan bolsań da myń shatasqan, "qulaǵan".

Ikramǵa oranarsyń túımesiz,

(Shyn máninde Kebin kıgen kúıdesiz).

Uǵynasyń tirshiliktiń mánisin,

Keterińdi "úldesiz de búldesiz"

Mıllıon pende tili basqa, reńi,

Bir-birine  iltıpat-qyp júredi.

Lá ıllaha ılallah der, Alla der,

Minájaty, birdeı tuma tileýi.

Jeti aınalyp qasıetti Qaǵbany,

Tas atasyń shaıtanǵa da joldaǵy.

Jan saraıyń tazalanar aınadaı,

Tym jýyqtan sezinesiń Allany.

Alla  deısiń,  janaryńnan jas parlap,

Táýbeńe kep, bóten  oılar qashty aýlaq.

Zámzámimen shól basasyń ǵajaıyp,

Arafattyń bıiginde aspandap.

Tazarasyń, qaıta kelip ómirge,

Qylaýdaı kir qalmaıdy bul kóńilde.

 Keshegideı qorqynysh joq, úreı joq,

Jaratqannyń isi deısiń Ólim de.

Asyǵasyń namazyńa, sájdege,

Qyzyqpaısyń baılyq, mánsap, ózgege.

Sabyr etip,  shúkir deısiń   Allaǵa,

Taýfık ber dep qandaı qıyn kezde de.

Shúkir, alǵa jeteleıdi   áz Úmit,

Saýapty isiń oń ıyǵyńa jazylyp.

Meıirimi pendesine Allanyń,

Musylmannyń bir paryzy – Qajylyq.

Serikjan QAJI