Keshe Almatyda MEGA Park saýda úıi aýmaǵynda ornalasqan Juldyzdar Aleıasynda tanymal qazaq akteri, teatr jáne kıno rejıseri, senarıst, pedagog Asanáli Áshimovtyń qurmetine ornatylǵan juldyzdyń ashylýy boldy. Bul týraly Qamshy.kz Juldyzdar qupıasyna silteme jasap habarlaıdy.
Ashylý saltanatyna “Qazaqfılm” kınostýdıasynyń basshysy Baqyt Qaıyrbekov, Muhtar Áýezov atyndaǵy Qazaq Memlekettik Akademıalyq drama teatrynyń dırektory Erlan Bilál, Qazaqstannyń halyq ártisi, “Qazaqkonsert” basshysy Altynbek Qorazbaevtar qatysty.
“Barlyǵyńyzǵa rahmet aıtamyn. Mundaı juldyzdy ashý men úshin sál yńǵaısyz dúnıe, áıtsede Gollıvýd úlgisi boıynsha bul tamasha bastama. Qazaqstanda uly adamdar kóp, olardyń birazy ómirden ótip ketti. Kózi tirilerdiń arasynan Oljas Súleımenovty bóle-jara aıtqym keledi. Halyqtyń dańqty ulynyń juldyzy da osy aleıada “janýy” tıis dep oılaımyn. Bul men úshin tarıhı ári tolqynysqa toly kún. Qadyr Myrzálıev aıtqandaı adamǵa ómirden ótken soń emes, kózi tiri kezinde qurmet kórsetilýi tıis. Osy sharany uıymdastyrýshylardyń barlyǵyna erekshe alǵys aıtamyn”, – dedi Asanáli Áshimov.
Eske sala ketsek, Juldyzdar Aleıasynda tuńǵysh ret eki dúrkin olımpıada chempıony, tórt dúrkin álem chempıony Ilá Ilınniń juldyzy ornatylǵan bolatyn. Al kelesi juldyzdy “DOM” qorynyń basshysy Arýjan Saın “jaqty”. Ol bul juldyzdy barsha qazaqstandyq qaıyrymdylyq sharasynyń uıymdastyrýshylaryna arnaǵan. Juldyzdar Aleıasynyń qatary 2015 jyly kúzde olımpıada chempıony Aleksandr Vınokýrovtyń esimimen tolyqty.
