Túngi klýbtyń jarnamalyq banerine Qurmanǵazy men Pýshıkınniń «súıisip» turǵan sýretin salyp bergen ýkraındyq sýretshi Roman Stratııchýk qazir Vetnamda turady. Daýly «eńbegimen» aty shyqqan ol posterden shý shyqqanda elden ketýge májbúr bolǵan.

365info.kz portalyna suhbat bergen ol Qazaqstandaǵy jyldary, bizdiń elimizden alǵan áseri men mundaǵy mádenıetke, turmys pen qoǵam ómirine degen ustanymdar týraly oıyn bildiripti.

«Meniń Almatyǵa kóshýim óte ımpúlsıvti boldy. Jumys týraly usynysqa bir kúnnen de az oılandym. Ol kezde men Qazaqstanda turatyn biraz adamdy tanıtyn edim. Almatyda da sharýalarmen birneshe ret bolǵam. Sondyqtan, qaıda baratynymdy aldyn ala bildim. Al, bir elge birneshe kúnge kelip ketý men onda turaqtap qalý eki bólek másele», - deıdi Almatyǵa 2013 jyly kelip, byltyr kóship ketken ol.

Osy ýaqyt ishinde Almatyda kórgen-bilgenderinen ol qala ómirine qatysty synı kózqaras ta qalyptastyrǵan.

«Almatyda sáýlet jaǵy aqsap tur. Qolda bardy baǵalamaıdy. Biraq, men Almatyny jyly esteliktermen eske alamyn. Adamnyń sanasy nashar sátterdi umyttyryp, tek jaqsylaryn ǵana qaldyrady», - deıdi Roman Stratııchýk.

Vetnam, Ýkraına men Qazaqstandy salystyra kele bizdiń eldiń halqy buıyǵy, óz quqyqtaryn qorǵaýǵa tyryspaıtynyna kóz jetkizgen.

«Qazaqstanda barlyq adamdar tuıyq, qysylyp júredi.» Óz oıyn aıtý, erekshe bolýǵa, toptan bólinip shyǵýǵa degen talpynys atymen joq. Osyndaı jaǵdaıda adamdar toptan shyqpaı, kóppen birge júrýdi qanaǵat tutady» degen ol Almatyda Kıev pen Hoshımınde kezdestirmeıtin qyzyqtardyń da az emestigin atap ótedi.

Kóship-qonyp júrip tirlik keshýge úırengen sýretshi Qazaqstanǵa orala alatynyn da aıtypty.

«Almatydan men birinshi Kıevke kettim, birneshe aıdan soń Hoshımınge keldim. Qazaqstanǵa barsam tek mádenıet mınıstri bolyp qana baramyn. Kúlmeńizder! Dál osylaı jazyńyzdar. Qazaqstannyń mádenıetimen joǵary deńgeıde aınalysýǵa ázirmin. Sporttaryńyzda bári durys. Oǵan tıispeımin», - depti suhbatynda Roman Stratııchýk.