Atyshýly shymkenttik kásipker Toqtar Tóleshovtiń menshigindegi «Shymkentsyra» zaýyty ATF banktiń menshigine ótip ketti. Bul týraly Astana telearnasynyń tilshilerine bergen suhbatynda banktiń basqarýshy dırektory Eldos Jumabaev málim etti dep habarlaıdy Qamshy.kz Nur.kz silteme jasap.
Qarjy uıymyna kásiporyn 100 mln AQSH dollaryna tarta qarjy qaryz bolǵan. 2007 jyly bankten nesıe rásimdegen "Shymkentsyra" JSHS keıinnen nesıelik mindettemelerin oryndamaı qoıǵan.
Byltyrǵy jyldyń jeltoqsan aıynda sot bank paıdasyna shamamen 20 mlrd teńge óndirip alý týraly sheshim shyǵarǵan.
«Zaýyt satylymǵa qoıyldy. Ókinishke oraı, ony satyp alýǵa áleýeti jetetin alýshynyń bolmaýyna baılanysty satylym júzege aspady. QR zańnamasyna sáıkes bank sot oryndaýshydan ótpeı qalǵan satylym múlkin óz balansyna alý quqyǵymen shaǵymdana alady. Biz solaı jasadyq. Atalǵan shaǵym sot oryndaýshy tarapynan qanaǵattandyryldy. Qabyldap alý aktisi toltyrylyp, sáıkes qaýly shyǵaryldy. Atalǵan óndiris orny jumysyn toqtatpaıdy, syra shyǵarýdy jalǵastyrady. Tek bankke ol jumystarmen tikeleı aınalysýǵa tyıym salynǵandyqtan, bank enshiles kompanıa qurýǵa quqyly. Biz sonda atalǵan múlikti tolyqtaı aýdaramyz», - dedi basqarýshy dırektor.
Esterińizge sala keteıik, aǵymdaǵy jyldyń 30 qańtarynda qaltaly azamat Toqtar Tóleshov Shymkentte ótken arnaıy jasaq operasıasy barysynda quryqtaldy. Ony quryqtaý úshin qaladaǵy bedeldi meıramhanalardyń biri «Rıksos Hadısha Shymkent» qorshaýǵa alyndy. Bıznesmenniń turǵylyqty mekenjaıy men jumys ornyn tekserý kezinde qarý, esirtki zaty men oqýlyqtar tabylǵan. Munan soń Tóleshov eki aı merzimge ýaqytsha qamaýǵa alynyp, istiń tergelý barysy qupıa saqtaldy. QR Bas prokýratýrasy kásipkerdi Aqtóbede bolǵan lańkestiń oqıǵaǵa qatysy bar dep aıyptap, bılikti kúshpen qulatpaq bolyp, oǵan ótken jyldan beri daıyndyq jumystaryn júrgizgenin málimdedi. Keıinirek UQK qyzmetindegiler bıznesmenniń jer reformasyna qarsy aksıalardy qarjylandyrǵanyn málimdedi.
Kásipker ýaqytsha qamaýǵa alynǵan soń onyń ıeligindegi syra zaýytynyń qyzmetkerleri basy daýǵa qalǵan basshylarynyń bylyqtaryn jaıyp saldy. Aıtýlarynsha, syra zaýyty esebinen kásiperdiń tórt áıeli aı saıyn 2 mln 282 myń teńge kóleminde jalaqy alyp kelgen. Sonymen qatar, Tólesheovtiń otandyq bankterdiń birinde 300 mln dollar qaryzy bar ekeni jarıa etildi. Osydan soń onyń menshigindegi « Shymkent syra» zaýyty satylymǵa shyǵaryldy. Óndiris orny 28 mlrd teńgege baǵalandy. Alaıda atalǵan zaýytty satyp alatyn adamnyń tabylmaýyna baılanysty aýksıon ótpeı qaldy.
Jýyrda áleýmettik jelide qamaýda otyrǵan Toqtar Tóleshovtiń óz qolymen jazǵan moıyndaý haty paıda boldy. Onda kásipker óziniń qolastynda isteıtin Aıanovqa 100 000 AQSH dollaryn berip, qazaq jeriniń sheteldikterge satylatyny týraly aqparatty halyqqa taratý týraly tapsyrma bergeni jazylǵan.
«Men munyń halyq narazylyǵyn týdyratynyn, halyq jerin qorǵaý úshin alańǵa shyǵatynyn bildim», — delingen bıznesmen jazǵan hatta.
Erekshe aıta keterligi, tergeý jumystarynyń qorytyndysyna sáıkes kásipker Tóleshovke adam urlaý, kisi óltirý jáne taǵy da basqa bas-aıaǵy 16 qylmys jasady degen aıyp taǵyldy. Sot otyrysy erteń, ıaǵnı, 14 qyrkúıekte bastalady.
