Elemdegi 100 bedeldi tulǵanyń biri, tanymal ekonomıs, Garvardtyń fılosofıa doktory, Kolýmbıa ýnıversıteti Jer ınstıtýtynyń dırektory, BUU Bas hatshysynyń kedeılikpen kúres jónindegi arnaıy keńesshisi Djeffrı Devıd Saks Sırıadaǵy azamattyq soǵys planetadaǵy eń qaýipti daǵdarys dep biledi. Ol bul jaıynda «Project Syndicate» portalyna jazǵan maqalasynda aıtqan, - dep habarlaıdy Qamshy.kz.
2011 jyldyń basynan beri Sırıada júzdegen myń adam qaza taýypty. On mıllıonǵa jýyq sırıalyq bóten elge ketýge májbúr bolǵan. Djeffrı Devıd Sakstyń pikirinshe, Barak Obama AQSH-tyń shynaıy rólin Amerıka halqynan jáne álemdik qaýymdastyqtan jasyrý arqyly atalmysh qaýipti kúsheıtip otyr. Sırıada soǵys aıaqtalý úshin AQSH shynaıy esep berýi kerek. Áıtpese 2011 jyldan beri bul soǵysty kim qarjylandyryp, kim qarýlandyrady? Bul qupıa.
Sarapshynyń oıynsha, Obama AQSH-ty Sırıadaǵy soǵysqa aralasýdan saqtap qaldy degen qate pikir. Qańtar aıynda New York Times basylymy 2013 jyly Prezıdenttiń Ortalyq barlaý qyzmetine Sırıadaǵy kóterilisshilerdi qarýlandyrý týraly jasyryn buıryq bergeni týraly maqala jarıalady. Maqalada, sondaı-aq Saýd Aravıasy qarýlandyrýǵa qomaqty qarjy bólgenin, al Ortalyq barlaý qyzmeti Obamanyń ámirimen oqytý men qoldaý kórsetýdi uıymdastyrýmen aınalysqany týraly jazylǵan.
Obama Amerıka halqyna Sırıa jerine bizdiń áskerler aıaq baspaıdy dep ondaǵan ret ýáde beripti. Alaıda Sırıada AQSH-tyń áskeri keńinen ornyqqany jurtqa aıan. «Biz Amerıkanyń Asadty taqtan taıdyryp, «Islam memleketin» jeńý úshin belsendi soǵys júrgizip jatqanyn bilemiz» deıdi sarapshy. Asadpen soǵysta Amerıkanyń jaqtastary Saýd Aravıasy, Túrkıa, Katar jáne aımaqtaǵy basqa da elder.
Amerıkanyń Sırıadaǵy soǵysqa jumsaǵan qarjysy mıllıardtaǵan dollarmen esepteledi. Naqty kólemi ashyq aıtylmaýda. «Amerıka halqyna beıbitshilik qajet» degen pikirmen maqalasyn túıindeıdi Djeffrı Devıd Saks.
Dana Qamshybek
