Erli-zaıypty jýrnalıser Marat Toqashbaev pen Raýshan Karshalovanyń  «Baqyttyń kilti» atty kitaby jaryq kórdi. Kitap otbasylyq qundylyqtardy nasıhattaýǵa arnalǵan. Búgingi elektronıka ǵasyrynda ómir súrý jeńil tárizdi kóringenimen baqytty otbasyn qurý ońaı emes. Tirshiliktiń shym-shytyryq buralańdarynan adaspaı ótip, óz jubyńdy tabý, taǵdyryńdy tapsyrǵan adammen til tabysý tek ıman men tózimniń, aqyl men sabyrdyń arqasynda ǵana múmkin.

Jazýshy-jýrnalıst Marat Toqashbaev  Qazaqstan Pedagogıkalyq Akademıasynyń akademıgi, profesor, respýblıkalyq qoǵamdyq-saıası «Prezıdent jáne Halyq» gazetiniń bas redaktory bolsa, qalamgerdiń jubaıy Raýshan Karshalova –  «Qazaqstan patrıoty» jýrnalynyń bas redaktory, Qazaqstan Jýrnalıser odaǵy syılyǵynyń laýreaty.

    Jýrnalıserdiń  ózara suqbaty túrinde berilgen pikir almasýlar otbasylyq ómirdiń alýan aspektilerin, erli-zaıyptylardyń  otbasyndaǵy  mindetterin, onda sabyr men ımandylyqtyń  alar ornyn talqylaıdy.    «Shańyraq shyraıynyń sharttary» bóliminde «Erli-zaıyptylardyń sóılesý mádenıeti», «Erin syılaǵan esikte qalmaıdy»,  «Qyzǵanyshtyń emi» tárizdi taqyryptar jurtshylyqtyń kókeıindegi  kóptegen suraqtaryna jaýap beredi.

«Dástúrimizdi dáriptesek» bóliminde qudalyqqa kimder baratyny, qorjyndy kimder ashatyny, «óli-tiri» aparýdyń syrlary, abysyndar ınstıtýty, ene men kelin ınstıtýty týraly óte qundy derekter berilgen.

Kitaptyń kelesi bir bóligi qazaq halqynyń ádet-ǵuryptaryn, salt-dástúrlerin nasıhattaýǵa arnalǵan. Ondaǵy qatelestirmeıtin qaǵıdalar jas jubaılarǵa taptyrmas aqylshy bolmaq.  «Baqyttyń kilti»  kitaby  shańyraq qurýdy oılastyryp júrgen qyz-jigitke ǵana emes, úılengenderine kóp jyl bolǵan qosaqtarǵa da  kádimgideı oı salarlyq dúnıe.