Astana qalasynyń mamandandyrylǵan aýdanaralyq áskerı sotynda burynǵy bıznesmen Toqtar Tóleshovke  qatysty alǵashqy sot otyrysy bastaldy. Qylmystyq is jabyq túrde qaralyp jatyr. Buqaralyq aqparat quraldary sot dálizin kúzetýde, - dep habarlaıdy Qamshy.kz QazAqparatqa silteme jasap.

Toqtar Tóleshov «Shymkentsyra» zaýytynyń burynǵy ıesi edi. 2016 jyldyń qańtarynda Shymkentte kúsh qurylymdary arnaıy operasıa júrgizip, ony qolǵa túsirgen bolatyn. Arada alty aı ótken soń, ıaǵnı, maýsym aıynda ulttyq qaýipsizdik komıteti resmı málimdeme jasaı otyryp, Toqtar Tóleshovke qarajaty men laýazymyn paıdalana otyryp, bılikti kúshpen basyp alýǵa árekettendi degen aıyp taqty. Bul oıyn júzege asyrý úshin Toqtar Tóleshov quzyrly organdar men áskerı saladaǵy vedomstvolardan sybaılastar tapqan eken. Jalpy, osy qylmystyq iste 25 fıgýrant bar.

El bıligin kúshpen basyp alýǵa árekettendi degen aıyptan basqa, Toqtar Tóleshovke adam urlady, bılikti basyp alýǵa úgit-nasıhat jasady, zańsyz qarý-jaraq saqtady degen taǵy ondaǵan bap boıynsha kiná taǵylyp otyr.

Aıtyp ótkenimizdeı, sot jabyq túrde ótip jatyr. Óıtkeni, qylmystyq iste memlekettik qupıalarǵa qatysty derekter bar. Sot tóraǵasy - Erbol Ahmetjanov.