Qamshy.kz redaksıasyna Qyzylorda oblysy Baıqońyr qalasynan habarlasqan Almaz Turǵanbaev degen azamat İİM-niń Baıqońyr qalasyndaǵy ókildiginde birqatar bylyqtyń baryn aıtyp otyr. Aıtýynsha tikeleı mınıstrlikke baǵynatyn ókildik basshylyǵy qyzmetkerlerdi alalap, negizsiz qýdalaıtyn kórinedi.

«Bala kezdegi armanym oryndalyp, 2007 jyly Qostanaı qalasyndaǵy İİM-niń zań ınstıtýtyn támamdap, Baıqońyr qalasyna qyzmetke keldim. İİM-niń osyndaǵy ókildiginiń krımınaldyq polısıa bólimine jedel ýákil bolyp ornalasyp, aǵa jedel ýákil laýazymyna deıin óstim. Almatyda lań salǵan R. Kúlikbaevtiń kesirinen laýazymymnan alynyp, rezervte júrmin», - deıdi A. Turǵanbaev.

Aıtýynsha, basshylyq Kúlikbaev qyrǵynyna deıin-aq qupıalyq rejımine jaýapty aǵa jedel ýákil laýazymynda júrgen A. Turǵanbaevty qyryna alǵan kórinedi.

«Otan qorǵaýshylar kúni qarsańynda saltanatty sherýge daıyndyqqa kelmeı qalǵanym úshin qyzmettik tekseris taǵaıyndap, tártiptik komısıada «qyzmetine tolyq emes sáıkestik» túrindegi tártiptik jaza qoldandy. Qyzmettik tekseris te belgilengen tártipterdi buza otyryp júrgizildi. QR İİM Baıqońyr qalasyndaǵy Ókildiginiń bastyǵy  polısıa polkovnıgi  Yrysbek Isaev pen onyń orynbasary polısıa polkovnıgi Baqytjan Quraqbaev ózderiniń qyzmettik babyn asyra paıdalanyp, B. Quraqbaev óziniń jeke jek kórýshilik jáne izge túsýi saldarynan, meniń ústimnen zańsyz qaralaý qujattaryn jınaqtap, jumystan bosatý máselesine qatysty alańdaımyn, sol sebepti onyń ústinen shaǵymdanýǵa bel býyp otyrmyn, ózim Ókildikte qyzmet atqarý  barysynda, birde-bir basshynyń jáne onyń orynbasarlarynyń nusqaýlaryna nemese buıryqtaryna qarsy kelmegen otanshyl qyzmetkermin dep esepteımin. 05.05.2016 jyly B. Quraqbaevtyń baıanatymen maǵan qatysty  jala-jaýyp, jasandy jınaqtalǵan tekseris qujattary Qyzylorda oblystyq İİD-men muqıat zerdelenip, 2016 jyldyń maýsym aıynyń shamasynda maǵan qatysty jaza taǵaıyndalǵan, osy tekseristi júrgizý barysynda Ókildiktiń basshylyǵy B. Quraqbaev  barlyq qyzmettik tekserý prosesine árdaıym qatysyp otyrǵan, alaıda QR quqyq qorǵaý organdary týraly Zańynyń 58 baby 2 tarmaǵynda «Qyzmettik tekserý barysyna jalpy onyń qortyndysyna múddeli jaqtar qatysýǵa bolmaıtyndyǵy, sonymen qatar bul talaptar oryndalmasa qyzmettik tekserý nátıjeleri zańsyz bolatyndyǵy» anyq kórsetilgen», - deıdi A. Turǵanbaev.  

A. Turǵanbaev basshylyq ózine qatysty ilik izdep, tipti ultshyldyq ıdeıasymen ýlanǵan, salafıt deýge deıin de barǵanyn aıtady.

«Jumys bólmemde bir qaǵazǵa jazylǵan «Qazaqıa» sózi úshin ultshyl atandym. R. Kúlikbaevti bólimshege shaqyryp, suhbat júrgizgende arabsha oqıtynyna kóz jetkizý úshin, ózim biletin tóte jazýda qaǵazǵa jazý jazyp, oqyttym. Sol qaǵazdy kórip alyp, basshylyq meni ýahhabıt, salafıt deýge deıin bardy. Qaıta Qyzylorda oblystyq İİD-degiler meniń basshylyǵymnyń baıandaǵan jalalaryna laıyqty jaýap berip, bul jerde eshqandaı zańǵa qaıshylyq joqtyǵyn aıtty», - deıdi qýǵyn kórgen polısıa qyzmetkeri.

A. Turǵanbaev qyzmetke ornalastyrý, laýazymdarǵa taǵaıyndaý máselelerinde de Ókildik basshylyǵy ózimbilemdikke kóp salynatyn kórinedi. Tikeleı mınıstrlikke baǵynatyndaryn aıtyp, oblystyq İİD-niń talaptaryna qulaq aspaıdy eken. Turǵanbaev zańǵa saı oblysqa jazǵan shaǵymdarynyń qaraýsyz qalýynyń sebebinde osymen túsindiredi.

Al, laýazymynan alynýyna negizgi sebep Almatyda qandy qyrǵyn uıymdastyrǵan Rýslan Kúlikbaev bolǵan. Aıtýynsha, R. Kúlikbaevtiń Baıqońyr qalasynan Almatyǵa ketip qalýyna A. Turǵanbaevty kináli dep sheshken.

«Birinshiden, Baıqońyr qalasy Reseı Federasıasynyń aýmaǵy bolyp sanalady. Qalaǵa kirip, shyǵý máselesi de solardyń quzyrynda. Ekinshiden, R. Kúlikbaevtiń qaladan shyǵýyna biz zań turǵysynan tyıym sala almaımyz. Ony ókildik qyzmetkerleri turaqty túrde shaqyryp, suhbattasyp, týystarymen de sóılesip júrdi. Almatyǵa baryp, saýda-sattyqpen aınalysyp júrgenin, turaqty túrde ol jaqqa ketý oıy joqtyǵyn aıtqan. Biz oǵan eshqaıda shyqpa dep aıtsaq, zań buzǵan bolamyz. Prokýratýraǵa shaǵymdansa, bizdi jaýapqa tartady», - deıdi polıseı.

«2016 jyldyń maýsym aıynyń ortasyna jýyq men ekstremızmge qarsy kúres tobynda qyzmet atqaryp, ondaǵy óz qyzmet salamdy úırenýge de belgili sebeptermen qolym tıgen joq, sebebi joǵaryda aıtylyp ketkendeı meniń jáne bólim bastyǵynyń orynbasary J. Jaqypovtyń ústinen birneshe márte tekseris júrgizip, úsh aı boıy (mamyr, maýsym, shilde) Y.Isaevtyń uıymdastyrǵan qaralaý áreketterine baılanysty jınaqtalǵan qujattarmen tanysýǵa, ol boıynsha túsiniktemeler berýge jáne Qyzylorda qalasyndaǵy oblystyq İİD-ge alty márte barýmen ótkizdik. Bul rette múldem qyzmet atqarýǵa mursha bolǵan joq. Jalpy 2016 jyldyń maýsym aıynyń 24-i men  shilde aıynyń 18-i aralyǵynda, ıaǵnı men eksremızmge qarsy kúres tobyna otyrǵan ýaqytta meniń óndirisimde Almatyda  rezonans týǵyzǵan qylmystyq áreketter jasap birneshe polısıa qyzmetkerleriniń ómirin qıǵan Kúlikbaev Rýslan Alpysbaıulyna qatysty qujat bolatyn, atalǵan qujat boıynsha men bir aı ishinde R. Kúlikbaevtyń aǵasy N. Kúlikbaevtan onyń Almaty qalasyna baryp kelip júrgenin jáne de Almaty qalasynda ekenini anyqtap,  krımınaldyq polısıa bóliminiń bastyǵynyń orynbasary polısıa maıory                      J. Jaqypovtyń nusqaýymen Qyzylorda OİİD-ne Eksremızmge qarsy kúres basqarmasyna eki márte anyqtama kúıinde habarlama jiberilen. Alaıda, rezonanstyq oqıǵanyń oryn alǵanynan keıin, Y. Isaev óz ústemdigin kúsheıtip, meni jáne J. Jaqypovty İİM-ge qaralaý baıanattaryn jazyp, bizdi qýdalaı bastady. Máselen, oqıǵa oryn alǵan sátten-aq Y. Isaev maǵan «qyzmetterińmen qosh aıtysa berińder, aqyrlaryn keldi» dep qaljyńdap, óziniń bastapqy uıymdastyrǵan maqsattaryna jetkenine maqtanǵan. Jalpy R. Kúlikbaevtiń qylmystyq oqıǵasyna qatysty 2016 jylǵy 26 shilde kúni menen bólek J. Jaqypovty, aǵa jedel ýákil K. Almanıazovty jáne kezekshi bóliminiń ınspektory Ó. Ermekovty «qyzmet atqaryp otyrǵan laýazymynan bosatý» jazasmen kadrlyq rezervke qoıǵan  bolatyn.  Alaıda, Y. Isaev bizdiń ashýymyzdy qozdyrý jáne ádiletsizdiktiń ústem bolatynyn dáleldeı otyryp, álgi K. Almanıazov pen Ó. Ermekovty Ókildiktiń shtab jáne kezekshi bólim ınspektory laýazymdaryna qaıta qyzmetke aldy. Alaıda Ókildikte álide bos turǵan laýazymdarǵa meni jáne J. Jaqypovty alýdan bas tartyp, kadrlyq rezerv erejelerin óreskel buzyp otyr», - deıdi A. Turǵanbaev.

Qyzmette qalatynynan úmitin úzgen polıseı polısıa ókildigindegi bolyp jatqan jaǵdaılardy ashyq jarıalaýǵa bel býǵan.

«Maǵan tek ádil sheshim bolǵany kerek, ózimde qandaı-da bir ambısıalar joq, oryn alǵan zańsyzdyq týraly Sizderge shaǵymdanýǵa bel býdym. Shydamym taýsyldy. Ózim Qazaqstan Respýblıkasynyń memleket qyzmetkeriniń ar-namysyn jerge taptatpaýǵa ár qashan da mindettenemin. Qazaqstan Respýblıkasyndaǵy ádildikke senimim zor.  Y.M. Isaev pen B. Quraqbaev oblys tóńireginde bedel-abyroıy zor ekeniniń jáne bizderge qatysty qysymnyń kúnnen-kúnge órshýin eskere otyryp, munda kórsetilgen laýazymdy tulǵalarǵa qatysty tekseristi polısıanyń ózindik qaýipsizdik basqarmasy emes, arnaıy prokýrorlar nemese sybaılas jemqorlyqqa qarsy is-qımyl qyzmeti júrgizýi kerek dep sanaımyn», - deıdi A. Turǵanbaev.

Redaksıamyzǵa habarlasyp muńyn shaqqan azamattyń aıtqandaryn yqshamdaǵanymyz osy boldy. A. Turǵanbaev óziniń qyzmet ornynda budan basqa da tártip buzýshylyqtar, zańsyzdyqtar kóp ekenin aıtady. Óz tarapymyzdan, el tynyshtyǵy men zań ústemdiginiń qyraǵy saqshylarynyń qıyn da jaýapty qyzmetine erekshe qurmetpen qaraı otyryp, polısıa basshylyǵy osy maqalada aıtylǵan jaǵdaıattarǵa qatysty qandaı da bir pikir bildirip, tıisti shara qoldanady degen senimdemiz.