Osydan birer mınýt buryn qazaqtyń talantty balýany Rasýl Qalıev fınalda mońǵol balýanyn utyp, erkin kúresten Azıa chempıony atandy.

Kúres túrlerinen Astanadaǵy "Dáýlet" sport kesheninde kórermenderdi qyzyqqa bólep jatqan Azıa chempıonatynda dál qazir aqtyq beldesýler ótýde. Erkin kúresten 57 keli salmaq dárejesinde el namysyn qorǵaǵan Rasýl Qalıev Mońǵolıa balýany Damdınbazar Sogtbahthrmen beldesip, 10:4 esebimen jeńiske jetti.

Bul jeńis Rasýlǵa ońaılyqpen kelgen joq. Basynda eki upaı aıyrmasymen utylyp jatyp, shybyn jandy shúberekke túıýge týra keldi. Rasýl bar kúsh-jigerin salyp, jeńiske degen jigerliliktiń úlgisin kórsete bildi. Basqasha bolýy múmkin emes edi! Rasýl óz jerimizde, óz kórermenderimizdiń aldynda senimdi aqtap shyqty.

Ekinshi kezeńde qarsylasyn aıaǵynan ustap, shalyp jyǵyp ta, boz kilemge shyr aınaldyryp ta, upaı qoryn molaıtty. Sóıtip, Azıanyń saf altynyn óńirinde jarqyratty.

Esterińizge sala keteıik, kúndiz ol tájik Vaısıdın Ibotovtan basym túsken-di. Sodan keıingi qarsylasy, úndistandyq Amıt Kýmar jaraqatyna baılanysty kilemge shyqpaı, kelesi kezeńge kúrespeı shyqqan. Jartylaı fınalda qyrǵyz Samat Nadyrbekulyn jeńip, fınalǵa shyqqan bolatyn. .tengrinews.kz