Qazaq zaǵıptar qoǵamynda taǵy da shataq shyqty. Burynǵy prezıdentin sottatyp tynǵan uıym ókilderi bul joly Almatydaǵy fılıal dırektoryn da qyzmetinen ketirmekke bekingen. Alaıda mekeme basshysynyń ońaılyqpen ornyn bergisi joq. Dırektordy kreslosynan kúshpen alyp tastamaq bolǵandar aqyr sońy qyrǵyn tóbelesti bastap ketti, - dep habarlaıdy Qamshy.kz KTK arnasyna silteme jasap.
Burynǵy basshysyn túrmege qamap tynsa da zaǵıptar qoǵamy áli tynshı qoımaǵan. Endi bul jolǵy talas osy qoǵamǵa qarasty Almatydaǵy oqý-óndiristik kásiporyn dırektorynyń oryntaǵyna qatysty júrip jatyr.
Altynaı Ibragımova, Qazaq soqyrlar qoǵamy №1 Almaty oqý-óndiris kásiporynynyń dırektory:
-Burynǵy dırektor osy jerdegi búkil qujattardyń mórdiń barlyǵyn, alyp, 6 aı boıy bizdiń kásiporynǵa jumys istetpedi. Endi búgingi kúni taǵy da sondaı jalǵan qujat ákelip, ábigerge túsirip jatyr.
Al ózin osy oqý-óndiris kásipornynyń jańadan taǵaıyndalǵan dırektorymyn dep tanystyrǵan azamat Altynaı Ibragımovanyń osydan eki kún buryn jumystan bosatylǵanyn alǵa tartty. Sondyqtan búgin qalaıda qyzmetke kirisýim kerek dep otyr.
Talǵat Pirimjanov:
-Zań júzinde qaıta saılanǵan jańa basshylyq ony ótken 13-i kúni jumystan bosatqan. Biraq ol ornyn tastap ketkisi kelmeıdi. Kezinde osy qoǵamnan urlaǵan 2,5 mıllıon teńgesi úshin áli qylmystyq is júrip jatyr. Biz sol aqshany qaıtaryp, myna jerden ketýin talap etemiz.
Qarsy taraptar qatty-qatty aıtsa da qur sóz jarystyryp qana turǵan. Alaıda janjal sózben bitpegen soń bir-biriniń jaǵasyna jarmasty.
Zińgitteı kúzetshi jigitter jetip kelse de, olarǵa qarap jatqan zaǵıptar joq. Kózben kórmese de qulash sermep judyryqtap, tipti dırektor keńsesiniń ishinde qolyna taıaq ustaǵandar da tabyldy. Báriniń kózdegeni buryshqa tyǵylǵan dırektordy qýyp shyǵý.
-Urma, ket!!! Joǵal!
Jappaı tóbeles uzaqqa sozylǵan soń oqıǵa ornyna polısıa kelip jetti.
Polısıa ókilderi kelgen soń ǵana jurt sabasyn tústi. Tártip saqshylaryna ere kelgen jedel járdem qyzmetkerleri sodan keıin ǵana taıaq jegenderge alǵashqy kómek kórsetti.
Áıteýir, qazaq zaǵıptar qoǵamy daýdan arylmaı qoıdy. Onyń burynǵy prezıdenti Baıbolat Áýbákirov te talaı jylǵy teketiresten keıin 7 jylǵa sottalyp tynǵan edi. Sot ony búdjetke 1 mlrd. 300 mln. teńgeni jymqyrdy dep tapty. Bul jolǵy jappaı tóbeleske de osy qoǵamnyń búdjetin quraıtyn iri kólemdegi qarjy sebep degen sybys bar.
