Jetisýlyq áıelder boks quramasy Almaty oblysy ákiminiń júldesi úshin ótetin dástúrli "Jetisý kýbogy" jolyndaǵy halyqaralyq jarysqa daıyndalý ústinde. Jarys jyldaǵy daǵdy boıynsha qazan aıynda Taldyqorǵan qalasynda ótkizilmek. Bıylǵy básekege elimizdiń ár aımaqtarynan bólek, kórshi Qyrǵyzstan men Ózbekstannan jáne Reseıden de boksshylar kelip baq synaıtyn bolady, - dep habarlaıdy Qamshy.kz "Jetisý" arnasyna silteme jasap.
Sport mektep-ınternatynyń tárbıelenýshisi Anar Qoja bokspen 2013 jyldan bastap aınalysyp keledi. Sońǵy kezderi jaqsy nátıje kórsetip júr. Kúndelikti jattyǵý zalynan shyqpaıdy. Aldaǵy ótetin "Jetisý kýbogy" jolyndaǵy jarysqa qyzý daıyndyq ústinde. Anardyń osy kúnge deıin respýblıkalyq deńgeıde jetken jetistikteri de az emes. Ol 2014-2015 jyldary el chempıony atandy. Ári osy maýsymda halyqaralyq "Azıa balalary" týrnırinde tamasha óner kórsetti.
ANAR QOJA BOKSTAN SPORT SHEBERİ
Halyqaralyq "Azıa balalary" týrnıri biz sıaqty jas sportshylar úshin aıtýly doda. Sondyqtanda men ózimniń bar kúsh-jigerimdi saldym. Alǵashqy jekpe jegimde ózime senimdi bolǵandyqtan, qarsylasymdy ońaı ári esh qıyndyqsyz jeńdim. Al ekinshi kezdesýde reseılik boksshymen judyryqtasqanda biraz qobaljydym, biraq qansha degenmende upaı jaǵynan odan basym tústim. Negizinen boksta sportshyda minez qalyptasady. Jattyǵýlar sportshy boıyndaǵy kúızelisti joıady.
Boks - tek emosıonaldyq beriktikti ǵana emes, úlken ári qajyrly eńbekti de talap etedi. Máselen, qyzdardyń ár jattyǵýy bir jarym saǵatqa sozylady - dene jattyǵýlary, soqqyǵa tótep berý, sparrıng sekildi kezeńderden turady. Bapkerler sportshylardyń fızıkalyq jáne psıhologıalyq jaǵdaılaryn da muqıat baqylaýda. Sebebi alda "Jetisý kýbogy" týrnıri ótkizilmek. Onda jeńimpaz ataný úshin bizdiń qyzdar elimizden bólek, myqty degen ózbek, qyrǵyz, reseılik sportshylardan da basym túsýi tıis.
SERİKBAI TURLYBEKOV BAPKER
Men buryn ul balalarmen jumys jasaǵanmyn, al qyz balalarmen jumys jasaý úshin men óz ádisterimdi ózgerttim. Bul úlken jumys, mundaǵy ár qyz balanyń óz minezi bar, olardyń árqaısysyna jol taba bilý qajet.
Bapkerler elimizdiń júldegerleri men jeńimpazdary Farıza Dagen men Aıda Qojanǵa úlken úmit artyp otyr. Óz shákirtteriniń aldaǵy týrnırge daıyndyǵyn shyńdaý úshin qyzdardy Almaty qalasynda jáne Talǵar aýdanynda ótetin oqý-jattyǵý jıyndaryna da qatystyrmaqshy.
