Qazaqstan Prezıdenti Nursultan Nazarbaev Almaty oblysyna sapary barysynda jańa Nurkent qalasynyń damýynyń bas josparymen tanysty, - dep habarlaıdy Qamshy.kz Aqordanyń baspasóz qyzmetine silteme jasap.
Sonymen qatar, Nazarbaev Taldyqorǵan qalasynyń damýynyń bas josparymen, sondaı-aq Jarkent-Qorǵas aglomerasıasynyń qala qurylysy turǵysynan damýynyń keshendi jobasymen tanysty.
Nurkent qalasy "Qorǵas - Shyǵys qaqpasy" arnaıy ekonomıkalyq aımaǵynyń quramyna kiredi. Bolashaqta bul qalada 100 myńnan asa adam turyp, aýdany 300 gektardan asady. Arnaıy ekonomıkalyq aımaqtyń qurylysy 2020 jyly aıaqtalady. Osydan keıin bul shekara aımaǵy jańa Jibek jolynyń tiregine aınalady.
Eske salaıyq, osyǵan deıin Nursultan Nazarbaev Taldyqorǵan qalasyna kelip, áýejaı men áýe vokzaly ǵımaratyna bardy. Memleket basshysy áýejaı men áýe vokzaly ǵımarattaryn qaıta jóndeý jumystarynyń barysymen tanysty. Sondaı-aq, Elbasyǵa ushý-qoný jolaǵyn jańartý jumysy, áýejaıdy jáne óńirdiń týrısik ınfraqurylymyn damytý perspektıvalary týraly baıandaldy.
Osydan keıin Nursultan Nazarbaev Tekeli taý-ken óndirisi kesheninde boldy. Aqordanyń baspasóz qyzmeti málimetinshe, Elbasy kásiporynnyń jumysymen tanysty. Qazaqstan Prezıdentine ınovasıalyq tehnologıalardy qoldana otyryp, qaıta balqytylǵan shoıyn alý arqyly temir rýdasyn óndirý jáne óńdeý jónindegi jobanyń iske asyrylý barysy baıandaldy.
Keıin Memleket basshysy Taldyqorǵan qalasynyń kópsalaly aýrýhanasynda boldy. Qazaqstan Prezıdentine oblystyń densaýlyq saqtaý júıesin damytýdyń basty baǵyttary jáne tıisti memlekettik baǵdarlamalardyń iske asyrylý barysy týraly baıandaldy. Sondaı-aq, Nursultan Nazarbaev aýrýhana qyzmetkerlerimen kezdesti. Olar júrgizilip jatqan áleýmettik saıasatqa qoldaý bildirip, densaýlyq saqtaý salasyna kórsetilip otyrǵan qamqorlyq úshin Elbasyǵa alǵystaryn aıtty. Keıin Qazaqstan Prezıdenti Oqýshylar saraıynda bolyp, olarǵa jaıly avtobýs syılaǵan edi.
