Premer-Mınıstr Baqytjan Saǵyntaev turaqtandyrý qorlaryna azyq-túlik alýǵa bólingen qarjyny tıisti deńgeıde ıgerýdi tapsyrdy,- dep habarlaıdy Qamshy.kz  KazInform-ǵa silteme jasap.

«Turaqtandyrý qorlaryn azyq-túlikpen toltyrýǵa bólingen qarjy depozıtterde bostan bos jatyr. Ne úshin ıgerilmeı jatyr?!»,-dedi Premer-Mınıstr Úkimet otyrysynda oblys ákimderine qaratyp aıtqan sózinde.

Sonymen qatar, B. Saǵyntaev elimizdiń óńirlerinde qaraqumyqtyń baǵasy eleýli óskenin aıta kele, osy rette jaqyn arada bul máseleni sheshýdi tapsyrdy.

Óz kezekterinde Úkimet otyrysyna selektorlyq baılanyspen shyqqan óńir ákimderi bul baǵyttaǵy jumystardy taıaý arada retke keltiretinine ýáde etti.

QR Úkimeti otyrysynda Ulttyq ekonomıka mınıstri Qýandyq Bıshimbaev turaqtandyrý qorlaryn azyq-túlikpen toltyrýǵa bólingen qarjy depozıtterde jatqanyn habarlaǵan bolatyn.

«Barlyq óńirlerde turaqtandyrý qorlaryn toltyrýǵa arnalyp bólingen aqshalaı qarajattar tıisti deńgeıde qoldanylmaıdy. Máselen, búgingi kúni aqshalaı qarajat qaldyqtar turaqtandyrý qorlarynyń aǵymdaǵy jáne depozıttik shottarynda jatqan 4 mlrd. teńgeni quraıdy», - dedi Q.Bıshimbaev.