Shymkent-Tashkent tas jolynda taǵy da iri jol apaty oryn aldy. Qaıǵyly oqıǵa búgin saǵat 14:00 shamasynda Tashkent tas jolynyń 30-shaqyrymynda oryn alǵan. Jol kólik oqıǵasy saldarynan eki adam qaıtys boldy. Bul týraly Qamshy.kz Nur.kz-ke silteme jasaı otyryp habarlaıdy.
Tas jol boıynda «Folksvagen-Djetta» men jolaýshylar tasıtyn «KIA-Karnıval» kólikteri soqtyǵysqan. Saldarynan «Djetta» ekige bólinip qaldy, onyń júrgizýshisi oqıǵa ornynda kóz jumǵan. Al, «KIA» kóliginiń qozǵaltqyshy julynyp túsipti. Kóliktegi jolaýshylardyń biri qaıtys boldy, onyń basy kesilip túsken dep habarlaıdy telearna tilshileri.
Apattan keıin aýrýhanaǵa 6 adamnyń jetkizilgeni belgili boldy. Olardyń qazirgi jaǵdaıy belgisiz.
Aldyn ala boljam boıynsha, «Folksvagen-Djetta» júrgizýshisi tizginge ıe bola almaı, joldyń qarsy baǵytyna shyǵyp ketken. Alaıda, kimniń kináli ekenin sot saraptamasy anyqtaıtyn bolady.
Jolaýshylar kóligi Jibek joly aýylynan Shymkentke qaraı bet alǵan eken. Onyń salonynda Ózbekstannyń 6 azamaty bolǵan. Barlyǵy da Ferǵana oblysynan Qazaqstanǵa jumys isteý maqsatynda kelipti. Tek, kólik júrgizýshisi ǵana QR azamaty.
Esterińizge salaıyq, dil osy tas joldyń boıynda birer kún buryn iri jol kólik oqıǵasy oryn alǵan bolatyn. Ol kezde de jolaýshylar tasıtyn Ford mıkroavtobýsy men jeńil kólik soqtyǵysqan. Saldarynan 6 adam qaıtys bolyp, taǵy birneshe jolaýshy aýrýhanada em qabyldap jatyr. Kóz jumǵandar qatarynda úsh jasar qyz da bar.
