Qazaqstan Respýblıkasynyń Memlekettik hatshysy Gúlshara Ábdiqalyqovanyń tóraǵalyǵymen Qazaqstan Respýblıkasynyń Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komısıanyń otyrysy ótti, - dep habarlaıdy Qamshy.kz Aqorda saıtyna silteme jasap.
Komısıa otyrysyn ashqan G.Ábdiqalyqova Qazaqstan Respýblıkasy Úkimetiniń 2016 jylǵy 9 qańtarda ótken keńeıtilgen otyrysynda Memleket basshysynyń daǵdarysqa qarsy jospardan strategıalyq damýdyń mindetterin oryndaýǵa kóshý jónindegi bergen tapsyrmalaryn iske asyrý úshin árdaıym sybaılas jemqorlyq kórinisteriniń aldyn alyp, memlekettik baǵdarlamalarǵa bólinetin búdjet qarajatynyń qatań baqylanýyn qamtamasyz etý qajettigin atap ótti.
Otyrys barysynda birqatar memlekettik organdar men «Atameken» ulttyq kásipkerler palatasynyń baıandamalary tyńdaldy. Sáýlet, qala qurylysy jáne qurylys salalaryndaǵy sybaılas jemqorlyqqa qarsy kúres, sondaı-aq memlekettik ındýstrıalyq-ınnovasıalyq damý baǵdarlamalaryn iske asyrýǵa bólingen búdjet qarajatyn ıgerý jónindegi sharalar talqylandy.
G.Ábdiqalyqova osy saladaǵy sybaılas jemqorlyq qaterlerin azaıtatyn tetikter qalyptastyrýǵa erekshe nazar aýdarý qajet ekenin atap ótti. Olardyń tıimdilik dárejesine ekonomıkanyń ahýaly ǵana emes, memlekettiń ınvestısıalyq tartymdylyǵy da qatysty bolmaq.
Sondaı-aq, memleket tarapynan ındýstrıalyq-ınnovasıalyq damýdyń 2010-2014 jáne 2015-2019 jyldarǵa arnalǵan baǵdarlamalaryn oryndaýǵa eleýli búdjet qarajaty bólinetini aıtyldy. Olardy júzege asyrý kezinde búdjet qarajatyn paıdalanýǵa qatysty kóptegen zań buzý jaıttary qatar júretini anyqtaldy. Indýstrıalandyrýdyń alǵashqy baǵdarlamasy iske asyrylǵaly beri aqshalaı qarajatty jymqyrý faktileri boıynsha memleketke 13 mlrd teńgeden astam zıan keltirilgen.
Memlekettik hatshy baǵdarlamalardyń jergilikti jerlerde Elbasynyń tapsyrmalaryna sáıkes tıimdi oryndalýynyń, árbir ınvestısıalyq jobanyń iske asyrylýynyń, sondaı-aq halyqqa memlekettik qyzmetter kórsetý kezinde elektrondyq resýrstar múmkindikterin keńinen paıdalanýdyń mańyzdylyǵyn atap kórsetti.
Komısıa sheshimimen memlekettik organdarǵa zańdylyqty buzý faktilerine qatysty máselelerdi retteý jáne aldaǵy qyzmette olarǵa jol bermeý sharalaryn qarastyrý tapsyryldy.
Komısıa otyrysynyń qorytyndysy boıynsha memlekettik organdarǵa naqty usynymdar men tapsyrmalar berildi.
