Shymkent pen Tashkent arasyn jalǵaıtyn trassada sońǵy bes kúnde úshinshi iri jol apaty oryn aldy dep habarlaıdy Qamshy.kz Nur.kz-ke silteme jasap.
«Tashkent-Almaty-Termez» tas jolynyń boıynda «Aqjol» dámhanasyna jaqyn mańda Mercedes-Benz kóligi jol boıynda turǵan GAZel júk kóligine soqtyǵysqan. Saldarynan jeńil kólikte bolǵan úsh jolaýshy men júrgizýshisi qaıtys boldy.
Kýágerlerdiń aıtýynsha, Mercedes-Benz joǵary jyldamdyqta júıitkip kelip, júrgizýshisi tizgindi ıgere almaı qalǵan. Saldarynan jol jıeginde toqtap turǵan GAZelge baryp soqtyǵysypty.
Soqqynyń qatty bolǵany sonsha, jeńil kólik adam tanymastaı bolyp myjylyp qalǵan. Salonda bolǵan úsh jolaýshy oqıǵa ornynda kóz jumypty. Júrgizýshini jedel járdem kóligi aýrýhanaǵa alyp ketken. Alaıda, ol da alǵan dene jaraqattary saldarynan jolda qaıtys boldy.
Oqıǵa bolǵan sátte GAZelde adam bolmaǵan. Onyń júrgizýshisi tamaqtanyp alý úshin dámhanaǵa kirip ketipti.
Belgili bolǵandaı, Mercedes-Benz kóliginiń júrgizýshisi búgin úılenýi tıis bolǵan. Kólikte qaıtys bolǵan jolaýshylardyń biri onyń bolashaq jary eken. Olar óz toılayna asyqqan dep jazady aqparattyq portal tilshileri. Qaıtys bolǵan taǵy eki adamnyń kim ekeni anyqtalýda.
Aıta keteıik, apat bolǵan jol bóliginde birneshe ýaqyttan beri jóndeý jumystary júrip jatyr. Sonyń saldarynan kólikter qarsy baǵytpen júrýge májbúr. Buǵan deıin osy trassada birneshe adamnyń ómirin jalmaǵan eki jol apaty bolyp úlgerdi.
