Laýazymdy memlekettik qyzmetkerge deldal arqyly para berdi dep aıyptalǵan Ońtústik Qazaqstan polıtehnıkalyq kolejiniń dırektory, oblystyq máslıhattyń depýtaty Amangeldi Sopbekov osy aptada oblystyq máslıhattyń kezekten tys sesıasyna qatysty. Bul týraly Qamshy.kz Nur.kz silteme jasap habarlaıdy.
Depýtat sesıa aldynda ótetin máslıhattaǵy turaqty komısıanyń otyrysynda da bolǵan (A.Sopbekov máslıhattaǵy áleýmettik damý jónindegi turaqty komısıanyń múshesi).
Esterińizge sala keteıik, Sybaılas jemqorlyqqa qarsy is-qımyl Ulttyq búrosynyń Ońtústik Qazaqstan oblystyq departamenti shilde aıynda oblystyq máslıhattyń depýtaty, Ońtústik Qazaqstan polıtehnıkalyq kolejiniń dırektory Amangeldi Sopbekovty sybaılas jemqorlyq qylmys jasady degen kúdikpen ustaǵanyn habarlaǵan bolatyn.
Atalǵan organnyń resmı aqparatynda onyń qaramaǵyndaǵy qyzmetkeri arqyly oblystyq bilim basqarmasynyń laýazymdy qyzmetkerine qosymsha memlekettik grant bólý úshin 3 mıllıon teńge kóleminde para bergeni aıtyldy. Onyń ústinen qylmystyq is qozǵalyp, tergeý amaldary bastaldy. Sopbekovtyń keıinirek úıqamaqqa alynǵany týraly resmı emes aqparat taraldy.
Endi mine, araǵa eki aı salyp, Amangeldi Sopbekov máslıhattaǵy depýtattyq mindetin atqarýǵa qaıta kiristi. Uzynqulaqtan jetken áńgimelerge qaraǵanda qazirgi ýaqytta depýtattyń ústinen qozǵalǵan qylmystyq is sotqa ótken kórinedi.
Amangeldi Sopbekov máslıhattyń kem degende úsh shaqyrylymnyń depýtaty. «Aqjol» partıasynyń ókili. Sońǵy saılaýda ol Shardara aýdanynan túsip, jeńiske jetti. Degenmen doda máresine jaqyndap qalǵan kezde jaısyzdaý jaǵdaıdy bastan keshkeni ras.
Bıliktiń partıasynan túsken kandıdattarǵa qıyndaý qarsylas bolatyndardy jarys jolynan jappaı shyǵaryp tastaý naýqanynyń qurbany bolatyn bilgen ol saılaý komısıasynyń otyrysy ótip jatqan ǵımaratqa belgisiz suıyqtyqty alyp kirip, óz-ózin órtemek bolǵan kórinedi. Aty-jóni naqty atalmasa da osyndaı faktiniń oryn alǵany Bas prokýratýranyń málimetinde keltirildi.
Saılaýdan keıin depýtattyń ústinen qylmystyq is qozǵalyp, tergeý amaldaryn júrgizý Ulttyq qaýipsizdik komıtetine tapsyrylǵany belgili boldy. Bir aıdan keıin onyń qysqartylǵany jergilikti telearnalardan aıtylǵan edi. Bul jolǵy qylmystyq istiń nemen aıaqtalatyny belgisiz.
