Astana qalasyndaǵy №2 Esil aýdandyq sotynda Seıitqazy jáne Áset Mataevtardyń isi boıynsha sot otyrysy jalǵasyp jatyr. Búgingi sot otyrysynda túsinik bergen Seıitqazy Mataev óz atyna túsirilgen azamattyq shaǵymdarmen kelispeıtinin habarlady. «Men «Qazaqtelekom» AQ-nyń jáne Baılanys, aqparattandyrý jáne aqparat komıteti túsirgen azamattyq shaǵymdarmen kelispeımin. Sebebi biz óz moınymyzǵa alǵan barlyq mindettemelerdi oryndadyq»,- dedi ol sot sýdıasyna bergen jaýabynda.
Aıta ketelik, buǵan deıingi sot otyrysynda zardap shekken tarap «QazTAG» halyqaralyq aqparat agenttigi» JSHS-inen 2010-2015 jyldary Baılanys, aqparattandyrý jáne aqparat komıtetimen jasalǵan sharttardyń talaptary boıynsha agenttikke tólengen qarajatty tolyqtaı óndirip berýdi ótingen bolatyn. Azamattyq shaǵymda «QazTAG» halyqaralyq aqparat agenttiginiń kórsetken qyzmeti tehnıkalyq sıpattamaǵa sáıkes kelmegeni týraly aıtyldy. Ony sotqa Aqparat jáne komýnıkasıalar mınıstrliginiń saraptamalyq departamenti dırektorynyń orynbasary Raýan Ahmetov oqyp berdi.
«Azamattyq shaǵymdy túsirý barysynda biz Qarjylyq baqylaý komıteti ókilderiniń, fılologtardyń jáne IT-tehnologıalary mamandarynyń tujyrymyn basshylyqqa aldyq. Sharttyń talaptary boıynsha «QazTAG» halyqaralyq aqparattyq agenttigi» JSHS-gi tehnıkalyq sıpattamada kórsetilgendeı kólemde sharttyń talaptaryna sáıkes keletindeı qyzmetti iske asyrý kerek bolatyn. Alaıda tekserý barysynda ol qyzmettiń shart talaptaryna sáıkes emestigi anyqtaldy. Qyzmet túri sharttyń talaptaryna sáıkes kórsetilmegendikten, árbir shart boıynsha búdjetten aýdarylǵan qarajat respýblıkalyq búdjettiń kirisine tolyq kólemde óndirilip alynady»,- dep túsindirdi Raýan Ahmetov.
Óziniń sotqa bergen jaýabynda Seıitqazy Mataev Baılanys, aqparattandyrý jáne aqparat komıtetiniń eshqandaı laýazymdy tulǵalarymen kezdespegenin aıtty.
«Aıyptaý aktisinde aıtylǵandaı, sol kezdegi komıtet tóraǵasy Bolat Bersebaevpen aramyzda eshqandaı da kelisim bolǵan joq»,- dedi S. Mataev.
Alaıda buǵan deıingi sot otyrysynda Baılanys, aqparattandyrý jáne aqparat komıtetiniń burynǵy tóraǵasy Bolat Bersebaev Seıitqazy Mataevtyń ózine paıdakúnemdik qyzyǵýshylyqpen ótinish jasap, «QazTAG» halyqaralyq aqparat agenttigimen eki lot boıynsha «bir kózden» qarajat bólýge shart jasaýdy usynǵanyn aıtty.
«Men Seıitqazy Mataevpen «Ulttyq baspasóz klýbynyń» Almatydaǵy ǵımaratynda kezdestim. Mataev shart jasaýdy surady. Meniń onymen janjaldasýǵa eshqandaı nıetim bolǵan joq. Oǵan qosa «QazTAG» sıaqty bedeldi agenttiktiń memlekettik aqparattyq saıasatty tıimdi jáne sapaly nasıhattaıtynyna úmit arttym»,- dedi kýáger.
Tergeýdiń nusqasy boıynsha, 2010-2015 jyldar aralyǵynda Seıitqazy Mataev óz uly – «QazTAG HAA» JSHS-iniń bas dırektory Áset Mataevpen birlesip aldyn-ala bir top adamdarmen sóz baılasyp, aldaý men senimdi teris maqsatqa paıdalaný jolymen memlekettik satyp alý salasyndaǵy iri kólemdegi búdjet qarajatyn jymqyrǵan. Urlanǵan aqshanyń kólemi 169 mln. teńgeni quraıdy. Aıtpaqshy, sottyń búgingi otyrysynda Seıitqazy Mataev: «Ulttyq baspasóz klýby» qoǵamdyq birlestiginiń shtatynda jalǵyz ózim ǵana boldym» dep málimdedi. Sondaı-aq, ol qoǵamdyq birlestikke eshqandaı múshelikke ótpegen azamattyq tulǵalarǵa 254 mln. 721 teńge aýdarǵanyn da rastady.
Ámirlan Álimjan
