Almaty oblysy Jambyl aýdanynyń ortalyǵy Uzynaǵash eldi mekenine mal satýǵa kelip joǵalǵan úsh azamatty izdestirýge eriktiler deqosyldy, - dep habarlaıdy Qamshy.kz.
Mal saýdasyn kásibine aınaldyrǵan 1979 jylǵy Doldanuly Jarqynbek, 1973 jylǵy Zarlyhanuly Muqıat pen Álimhan Qadylbek esimdi jigitter Shyǵys Qazaqstan oblysynyń Tarbaǵataı aýdanynan 40 bas mal satyp alyp, ony eki júk kóligimen 17 qyrkúıek, senbi kúni, Almaty mańyndaǵy Uzynaǵash bazaryna shyǵarǵan.
Kóksý aýdany Qazaqstan aýylynyń turǵyny Tursyn Ámirbaıdyń aıtýynsha, joǵalǵan úsh jigit sol kúni bazarǵa shyǵarǵan maldary ótpeı, kelesi kúni, ıaǵnı jeksenbide, qaıta bazarǵa barady. Sol kezde olarǵa bir azamat kelip, «maldaryńdy túgeldeı men satyp alamyn» dep, ár bas malǵa 143 myń teńgeden baǵa qoıady ári Uzynaǵashtan 40 kılometr mólsherinde shalǵaı ornalasqan aýylyna jetkizip berýin ótinedi.
Kelisim boıynsha atalǵan úsh jigit 40 bas mal tıelgen eki júk kóligimen bazardan shyǵady. Ony kórgen bir kýáger maldardy satyp alamyn dep kelisken adamnyń da túrin jattap alǵan.
«Sol kúni tústen bastap úsh jigittiń qalta telefondary óshken. Sodan beri eshqandaı habar da, derek te joq. Eger maldary shynymen satylǵan bolsa qaltalarynda 5 mıllıon 720 myń teńge kóleminde aqsha boldy degen sóz. Ne óli, ne tiri ekeninen beıhabarmyz. Baýyrlarymdy izdep tabýǵa kómektesińizdershi», – deıdi dereksiz ketken jigitterdiń aǵaıyny Adal Zarlyhan esimdi azamat.
Onyń aıtýynsha, dúısenbi kúni tústen keıin Almaty-Astana tasjoly boıyndaǵy Qansheńgel aýyly mańynda úsh jigitke tıesili júk kólikteriniń biri órtengen kúıde tabylǵan. Sol kúni keshke qaraı órtengen kóliktiń janynan jeńil kólikke mingen eki jigittiń ketip bara jatqanyn, azdan soń órtengen mashınany ózge bireýlerdiń baryp óshirgenin kórgen kýágerler de tabyldy. Búgin joǵalǵan kisiler mingen ekinshi kóliktiń de tabylǵany belgili boldy.
Qazir bul ispen Almaty oblysy Jambyl aýdandyq polıseıleri aınalysyp jatqan kórinedi. Polısıadan bólek izdeý jumysyna 200-den astam eriktiler de tartylyp, WeChat jelisinde arnaıy top ta qurylǵan.
