Elbasy Nursultan Nazarbaev Gonkong arnaıy ákimshilik aýdanynyń qarjy mınıstri Djon Sangpen kezdesti. Kezdesýde «Astana» halyqaralyq qarjy ortalyǵyn qurý barysyndaǵy ózara is-qımyl jan-jaqty talqylandy, - dep jazady Qamshy.kz "Ońtústik Qazaqstan" gazetine silteme jasap.

Memleket basshysy sapardyń mańyzy zor ekenin, sondaı-aq Gonkongtyń qarjy, ınovasıa jáne tehnologıa salalaryndaǵy tájirıbesiniń qundylyǵyn atap ótti.

– Gonkong álemdik jetekshi qarjy ortalyqtarynyń biri bolǵandyqtan, Sizderdiń tájirıbelerińiz bizge asa qajet. Qazirgi ýaqytta biz qalyptasý kezeńin bastan ótkerýdemiz. Jalpy, ózara is-qımylymyz Qazaqstan men Qytaı arasyndaǵy dostyq qarym-qatynastyń aıasynda ilgerilep keledi, – dedi Qazaqstan Prezıdenti.

D.Sang Nursultan Nazarbaevqa kórsetken qonaqjaılylyǵy úshin alǵys aıtyp, buǵan deıingi ótken kelissózderdiń tabysty bolǵanyn atap ótti.

– Qazaqstan men Qytaı arasyndaǵy seriktestik baılanystar yntymaqtastyǵymyzdyń negizi bolyp sanalady. Delegasıamyzdyń quramynda 20-ǵa jýyq isker azamat bar. Biz Qazaqstan tarapymen jemisti kelissózder júrgizip, kún tártibindegi barlyq máseleler jóninde ózara túsinistikke qol jetkize bildik, – dedi D.Sang.

Budan bólek, Gonkongtyń qarjy mınıstri Nazarbaev ýnıversıtetiniń stýdentterimen áńgimelesýden zor áser alǵanyn atap ótti.

Sońynda Elbasy Nursultan Nazarbaev pen D.Sang Qazaqstan men Gonkongtyń odan ári yntymaqtastyǵy tabysty bolatynyna senim bildirdi.