Elbasy Nursultan Nazarbaevtyń Úkimettiń keńeıtilgen májilisinde júktegen mindetterin sapaly ári merziminde oryndaýdyń mańyzy zor. Oblys ákimdiginiń aparattyq májilisinde óńir basshysy Beıbit Atamqulov osylaı dedi.
Memleket basshysy Úkimettiń negizgi jumystarynyń biri jappaı kásipkerlikti yntalandyrý jáne halyqty jumyspen qamtý bolýy tıis ekenin atap ótken-di. Bul baǵyttaǵy jumysty jandandyrý maqsatynda «Jumyspen qamtý – 2020 jol kartasy» baǵdarlamasynyń aıasynda 5 óńirde «Aýyl turǵyndaryn jumyspen qamtý» pılottyq jobasy iske qosylǵan. Osy oraıda Elbasy Úkimetke ákimdermen birlesip, aýyldyq jerlerde kooperasıalar uıymdastyrý boıynsha barlyq sharalardy qabyldaýdy tapsyrǵany belgili. Sol sebepti oblys ákimi B.Atamqulov aýyl sharýashylyǵy kooperasıalaryn qurý máselesine erekshe toqtaldy. Aýyl sharýashylyǵy kooperasıalary ónimdi ótkizý jáne qaıta óńdeýmen aınalysady. Beıbit Bákirulynyń aıtýynsha, bul tapsyrma, ásirese, Maqtaaral, Saryaǵash, Qazyǵurt, Tólebı jáne Ordabasy aýdandary úshin ózekti. B.Atamqulov aýdan ákimderine osy baǵyttaǵy jumysty qolǵa alýdy júktedi. Turǵyndardyń arasynda keń kólemdi túsindirý jumystaryn júrgizip, aýyl sharýashylyǵy kooperasıalarynyń tıimdiligine sharýalardyń kózin jetkizý kerek. Óńir basshysy Túlkibas aýdany kórshiles Jambyl oblysymen sút jáne sút ónimderin ótkizý jóninde yntymaqtastyq ornatýy kerektigin atap ótti.
Oblys ákiminiń orynbasary Erbol Sadyrǵa aımaqtyq damý josparyn ázirleýdi tapsyrdy. Sonymen qatar, osyndaı josparlar bir aptanyń ishinde barlyq aýdan, qalalarda qabyldanýy kerektigin eskertti.
Memleket basshysy Úkimetke aldaǵy 5 jylda ıgerilmeı jatqan 600 myń gektar alqapty aınalymǵa qosý jóninde tapsyrma bergen bolatyn. Osyǵan oraı óńir basshysy oblys aýmaǵynda ıgerilmeı jatqan egistik alqaptardy aınalymǵa qaıta qosý men aǵyn sýmen qamtamasyz etý problemalaryn sheshýdiń mańyzdylyǵyna toqtaldy. Egistikti aǵyn sýmen tolyq qamtamasyz etý úshin oblystyq aýyl sharýashylyǵy basqarmasyna aýdan ákimdikterimen birlese otyryp, apatty jaǵdaıdaǵy sý qoımalaryn jóndeý men jańalaryn salýdyń josparyn ázirleýdi tapsyrdy.
– Egistik alqaptardy sýlandyrý máselesin sheshýde sý qoımalaryn salýdyń mańyzy aıryqsha. Báıdibek aýdanynda úlken sý qoımasy salynyp jatyr. Bıyl onyń qurylysy aıaqtalýy kerek. Otyrar aýdanynda da bul baǵytta jumys júrgizilýde. Oblystyq basqarma barlyq aýdandarda osyndaı múmkindikterdi zerttep, jospar ázirleýi tıis, – dedi Beıbit Bákiruly.
Oblys basshysy «Jibek joly» ekonomıkalyq beldeýiniń aıasynda 51 qazaq-qytaı birlesken jobasy jasalǵanyn, onyń úsheýi bizdiń óńirge tıesili ekenin atap ótti. Bul jobalar oblys ekonomıkasynyń damýyna serpin berip, halyqty jumyspen qamtýǵa oń yqpal etedi dep kútilýde.
Elbasy jer qoryna qaıta monıtorıń jasaýdy jáne bas josparlarǵa tıisti ózgerister engizýdi tapsyrǵany belgili. Sebebi, ákimderge ıgerilmeı jatqan jer telimderin memlekettiń qajettiligi úshin, atap aıtqanda, turǵyn úı qurylysyn júrgizý maqsatynda satyp alý quzyreti berilmek. Oblys ákimi turǵyn úı qurylysy júrgiziletin aımaqtardaǵy kólik jáne ınfraqurylym máselelerin aldyn ala oılastyrý kerektigin aıtty.
Basqosýǵa qatysýshylar Ult josparynyń oryndalý barysyn, halyqty jumyspen qamtýdyń, oblystyń kólik tasymaly áleýetin arttyrýdyń jaı-kúıin, sondaı-aq, óńirdiń óz kólik-logıstıka habyn qurý máselelerin talqylady.
Májiliste «Nurly jol» baǵdarlamasynyń oblystaǵy oryndalý barysy da talqylandy. Bul másele jóninde oblys ákiminiń birinshi orynbasary Darhan Satybaldy baıandama jasap, oryn alǵan keıbir kemshilikterge toqtaldy. Darhan Amangeldiulynyń aıtýynsha, Saryaǵash aýdany Birtilek, Birinshi Mamyr aýyldaryndaǵy mektepterdiń qurylysyna bólingen qarjynyń 312 mıllıon teńgesi, Saıram aýdany Qosbulaq jáne Qarabulaq aýyldaryndaǵy mektepterdiń qurylysyna bólingen qarjynyń 244 mıllıon teńgesi ıgerilmegen. Sondaı-aq, Shardara qalasyndaǵy №3 shaǵyn aýdannyń ınjenerlik ınfraqurylymyna bólingen 51 mıllıon teńge de ýaqtyly ıgerilmeı otyr.
Oblys ákiminiń orynbasary Jaqyp Bókenbaevtyń aıtýynsha, «Bıznestiń jol kartasy – 2020» baǵdarlamasynyń aıasynda oblystyq energetıka jáne turǵyn úı-kommýnaldyq sharýashylyq basqarmasy arqyly ınfraqurylym jelilerin salýǵa baǵyttalǵan 4 jobaǵa 699 mıllıon teńge bólingen. Josparǵa sáıkes, 1 qyrkúıekke deıin 652 mıllıon teńge ıgerilýi tıis bolsa, is júzinde 456 mıllıon teńge nemese jospardaǵynyń 70 paıyzy ǵana ıgerilgen. Atap aıtar bolsaq, Maqtaaral aýdany men Túrkistan qalasyndaǵy jáne Shymkenttegi «Tassaı» ındýstrıaldy aımaqtarynyń ınfraqurylymyn tartý jumystary kesteden kesheýildep jatyr. Sondaı-aq, Túlkibas aýdany Mashat shatqalyndaǵy demalys aımaǵyn gazdandyrýǵa bólingen qarjynyń da eleýli bóligi ıgerilmegen.
B.Atamqulov aýdan ákimderine atalǵan kemshilikterdiń qysqa merzimde túzetilýin, al, oblys ákiminiń orynbasary Erbol Sadyrǵa qarjynyń ýaqytyly ıgerilmeýine jaýapty laýazymdy tulǵalarǵa tártiptik shara qoldaný jóninde usynys engizýdi tapsyrdy.
Májiliste oblystyń qysqy jylytý maýsymyna daıyndyǵy da qaraldy. Atalǵan másele jóninde oblys ákiminiń orynbasary Jaqyp Bókenbaev baıandama jasady. Oblys ákimi B.Atamqulov Kentaýda kómirmen qamtamasyz etý jumystarynyń oıdaǵydaı júrgizilmegenin synǵa alyp, qala ákimi Ábdibaqyt Maqulbaevqa atalǵan kemshilikti tez arada túzetýdi tapsyrdy.
– Ókinishke qaraı, tıisti basqarmanyń usynǵan málimetteri boıynsha, oblysta qysqa daıyndyq jumystarynda kóp kemshilikter oryn alǵan. Eldi mekenderdegi jylý qazandyqtarynyń jaǵdaıy syn kótermeıdi. Osy másele jyl saıyn qaıtalanady. Al, biz jylda aıaz bastalǵan kezde qys birinshi ret kelgendeı alasapyranǵa túsemiz. Qysqa daıyndyq jumystaryn jandandyrýdy Jaqyp Bókenbaevqa júkteımin, – degen Beıbit Bákiruly jylytý maýsymynyń sapasy men barysyna qatysty aýdan, qala ákimderiniń jeke jaýapkershiligi qaralatynyn eskertti.
Sondaı-aq, májilis barysynda oblystyq aýyl sharýashylyǵy basqarmasynyń basshysy Serik Turbekov jıyn-terim naýqanynyń barysyna toqtaldy.
Oblys ákimi B.Atamqulov tıisti laýazymdy tulǵalarǵa májiliste qaralǵan máselelerdi qatań baqylaýda ustap, kemshilikterdi túzetýdi tapsyrdy.
Aıdar QULJANOV, "Ońtústik Qazaqstan" gazeti
