1 qyrkúıek – Bilim kúni elimizdegi barlyq mektepte alǵashqy qońyraý soǵyldy. Al, óńirimizde jańa oqý jylynda el Táýelsizdiginiń 25 jyldyǵyna oraı 25 jańa mektep paıdalanýǵa berildi. Sonyń biri – Shymkent qalasyndaǵy Abaı aýdanyna qarasty «Yntymaq» shaǵynaýdanyndaǵy №54 jalpy orta mektebi. Jańa bilim uıasynyń ashylý saltanatyna oblys ákimi Beıbit Atamqulov arnaıy qatysyp, lentasyn qıdy. Budan keıin 900 balaǵa arnalǵan mektep ǵımaratyn aralap, zaman talabyna saı jabdyqtalǵan synyp bólmelerimen tanysty.
Shaǵynaýdan turǵyndarynyń kóbeıýine baılanysty jańadan boı kótergen mektepte balalardyń tolyqqandy bilim alýyna, salaýatty ómir saltyn ustanýyna barlyq jaǵdaı jasalǵan. Jańa ǵasyr urpaqtarynyń mektep qabyrǵasynan kásip meńgerip shyǵýyna múmkindik beretin arnaıy kabınetter jabdyqtalǵan. Oqýshy qyzdar eńbekke baýlý páninde is tigip, dámdi as ázirleýdi, uldar temirden túıin túıýdi úırenedi. Ol úshin aspazdar bólmesi, tigin jáne temir óńdeý sheberhanalary jabdyqtalǵan.
Alǵashqy qońyraýǵa arnalǵan saltanatty jıyn mektep aýlasynda ótti. Óńir basshysy B. Atamqulov ustazdar men shákirtterdi, ata-analardy jańa oqý jylynyń bastalýymen quttyqtady.
– Bul kún bilim salasynda ter tógip júrgen sizderdi jańa bastama, izdenisterge jeteleıdi dep senemin. Biz jahandaný prosesinde bilim sapasyna erekshe kóńil bólýimiz kerek. Búgin óńirimizde birinshi synyp tabaldyryǵyn barlyǵy 73 myńnan astam oqýshy attasa, bul byltyrǵymen salystyrǵanda 4 myńǵa jýyq balaǵa kóp. Men oblysymyzda birinshi synypqa barǵan árbir shákirtke mektep aýlasyna óz aǵash kóshetin otyrǵyzýdy usynamyn. Ár bala ózi ekken taldyń kórkeıgenin kórip ósse, keleshekte meıirimdi, qorshaǵan ortaǵa janashyr bolady. Bul da balany eńbekke tárbıeleýdiń jaqsy dástúrine aınalady dep oılaımyn. Elbasy ustanǵan sara saıasat pen mamyrajaı tynyshtyqtyń arqasynda salynyp jatqan jańa ǵımaratqa kirgeli otyrsyzdar. Endeshe, qalamyz kórkeıip, óńirimiz órkendeı bersin! – dedi oblys ákimi.
Beıbit Bákiruly mektep dırektory Ulǵan Mameshovaǵa bilim kilti men arnaıy syılyq tabys etti. Al, birinshi synyp oqýshylaryna Elbasy Nursultan Nazarbaevtyń atynan «Meniń Otanym – Qazaqstan» kitaby syıǵa berildi. Oqýshylar men ata-analar, aýyl turǵyndary jańa oqý jylynyń jańa ǵımaratta bastalǵany úshin oblys ákimine alǵys aıtty. Bilim merekesine, sondaı-aq, Shymkent qalasynyń ákimi Ǵabıdolla Ábdirahymov, oblystyq bilim basqarmasynyń basshysy Qýandyq Qulajanov, Shymkent qalalyq bilim bóliminiń basshysy Janat Tájıeva qatysty. Jıyn sońy mektep oqýshylary daıyndaǵan merekelik konsertke jalǵasty. «Aıgólek» bı toby mektep válsin bıledi. Alǵashqy qońyraý soǵylyp, áýege beıbitshilik nyshany – aq kógershin men shar ushyryldy.
