Elbasy Kókshetaý qalasyna jumys sapary aıasynda «Qazaqstan agro ınovasıalyq korporasıasy» jaýapkershiligi shekteýli seriktestigine baryp, ondaǵy qurastyrý úderisimen jáne shyǵarylatyn tehnıka úlgilerimen tanysty, - dep habarlaıdy Qamshy.kz Aqorda saıtyna silteme jasap.

Sonymen qatar, Nursultan Nazarbaev Aqmola oblysy jurtshylyǵy ókilderimen kezdesti.

Kezdesýge ardagerler, aýyl sharýashylyǵy kásiporyndarynyń, memlekettik organdardyń, úkimettik emes uıymdardyń jáne jastar uıymdarynyń jetekshileri, sondaı-aq bıznes qoǵamdastyǵynyń ókilderi qatysty.

Qazaqstan Prezıdenti jınalǵandarǵa arnaǵan sózinde Táýelsizdik jyldarynda memleket turaqty ekonomıkalyq ósim men joǵary áleýmettik standarttardy qamtamasyz ete alǵanyn atap ótti. 

– Búgingi tańda Qazaqstanǵa kelgen ınvestısıa kólemi 250 mıllıard AQSH dollarynan asty. 1995 jyldan beri qazaqstandyqtardyń tabysy 40 esedeı ósti. Turǵyndar ál-aýqatynyń artýy ómir jasynyń uzaqtyǵyn 67-den 72 jasqa deıin uzartýǵa múmkindik berdi. Bala týý ósimi – 60%. Bul oraıda balalarǵa tólenetin járdemaqy ósimi 7 eseden asty, – dedi Nursultan Nazarbaev.

Qazaqstan Prezıdenti oblysty ekonomıkalyq turǵydan ártaraptandyrýdyń basty qaınar kózi agrarlyq sektor ekenin atap ótti.

– Astananyń bir ǵana azyq-túlik beldeýi aıasynda 100-den astam jobany júzege asyrý úshin 85 mıllıard teńgege jýyq ınvestısıa tartyldy. Sońǵy 15 jylda 10 myńnan astam jańa traktor, astyq jınaıtyn kombaın men egin egetin keshen satyp alyndy, – dedi Nursultan Nazarbaev.

Buǵan qosa, Memleket basshysy óńirdiń týrısik salasyn damytý qajettigin atap aıtty. 

– Jyl saıyn oblysqa júz myńnan astam týrıs keledi, oǵan Shortandy-Býrabaı kýrorty aımaǵyna memlekettik qoldaý kórsetilgeni de septigin tıgizip otyr. Keler jyly jazda Astanada mańyzdy tarıhı shara – «EKSPO-2017» halyqaralyq kórmesi ótedi. Oǵan 100-den astam eldiń ókilderi qatysady. Olardyń kóbi Astanaǵa ǵana emes, osy óńirdiń týrısik nysandaryn da tamashalaýǵa keledi, – dep atap ótti Qazaqstan Prezıdenti.

Kezdesý aıasynda Aqmola oblysynyń ákimi óńirdiń negizgi áleýmettik jáne ekonomıkalyq kórsetkishteri, sondaı-aq ony damytý perspektıvalary týraly baıandady.

Sońynda Nursultan Nazarbaev jınalǵan qaýymdy el táýelsizdiginiń 25 jyldyq mereıtoıymen quttyqtap, otbasynyń amandyq-saýlyǵy men jańa tabys jáne baq-bereke tiledi.

Oblys turǵyndary Qazaqstan Prezıdentine jyly lebizderin bildirip, týǵan ólkesine udaıy qamqorlyǵy men ekonomıkany damytý, halyqtyń ál aýqatyn arttyrý baǵytynda atqaryp jatqan jumysy úshin rızashylyq bildirdi.