Ońtústik Qazaqstanda bir aptada bolǵan 3 jol apatyna qatysty tergeý barysyn İshki ister mınıstrligi óz baqylaýyna aldy dep habarlaıdy Qamshy.kz KTK arnasyna silteme jasap.

Ondaǵy arnaıy komısıa 4 kún ishinde «Tashkent-Termez» kúre jolyndaǵy 12 adamnyń ómirin qıǵan oqys oqıǵalar boıynsha tekserý júrgizip jatyr. Al qaýipsizdikti kúsheıtken kúngeıdiń polıseıleri ár kólikti toqtatyp, eskertý jasap álek.

«Tashkent –Termez» kúre jolyndaǵy aınaldyrǵan 20 shaqyrymdyq bóliginde 4 kún ishinde 12 adamnyń ómiri qıyldy. 19 qyrkúıek kúni munda 20 shaqty jolaýshyny ákele jatqan shaǵyn avtobýs aldyndaǵy kólikten ozbaq bolǵanda qarsy bettegi «Toıotamen» soqtyǵysqan. 6 adam qaza taýyp, 16-sy áli aýrýhanada jatyr. Taǵy eki kúnnen keıin Folksvagen jeńil mashınasy Ózbekstannan jumysshylardy ákele jatqan «Kıa» shaǵyn avtobýsymen soqtyǵysyp, eki adam sol jerde til tartpaı ketken bolatyn. Bireýiniń tipti basy julynǵan.

Al kúni keshe ǵana munda óziniń úılený toıyna asyǵyp kele jatqan jigit «Mersedesimen» jol jıeginde turǵan «Gazelge» soǵyldy. 25 jastaǵy kúıeý jigit pen onyń qos qaryndasy jáne dosy sol jerde til tartpaı ketti. Tórteýi de jer qoınyna tapsyryldy.

Osy jol apattary boıynsha tekserýdi qolǵa alǵan mınıstrlik ońtústiktegi birqatar shendilerdi jazalaýǵa bel býyp otyrǵan syńaıly.