El Táýelsizdiginiń 25 jyldyǵyn atap ótý aıasynda Aqmola oblystyq Tarıhı-ólketaný mýzeıinde úsh ınovasıalyq jobanyń tusaýkeseri ótti, - dep habarlaıdy Qamshy.kz anatili.kazgazeta.kz saıtyna silteme jasap.
Oblystyq mádenıet basqarmasynyń uıymdastyrýymen ótken shara barysynda jurtshylyq Alashtyń arysy Álıhan Bókeıhanovtyń ómir jáne eńbek jolymen, qazaqtyń ulttyq kıimderiniń úlgisimen jáne táýelsiz Qazaqstannyń aqsha belgileriniń tarıhymen tanysty.
Oblystyq mádenıet basqarmasynyń málimeti boıynsha, el Táýelsizdiginiń 25 jyldyǵyna arnalǵan mádenı sharalar 15 qyrkúıek pen 15 jeltoqsan aralyǵynda ótkizilmek. Tarıhı-ólketaný mýzeıinde ótkizilip otyrǵan ıgi is sol úsh aılyq baǵdarlamanyń bastaýy bolyp tabylady. Sharaǵa qatysyp, sóz sóılegen tarıh ǵylymynyń doktory, Qazaqstannyń eńbek sińirgen mádenıet qaıratkeri Qadyrjan Ábýov mýzeı uıymdastyrǵan ınovasıalyq jobalardyń mańyzdylyǵyn aıta kele, ásirese týǵanyna 150 jyl tolyp otyrǵan Alash arysy Álıhan Bókeıhanovtyń ómiri men eńbegin jas urpaqqa nasıhattaıtyn alǵashqy jobanyń mańyzyna toqtaldy.
– Bıyl Alash qozǵalysyna 100 jyl tolady. Qazaq halqynyń táýelsiz el bolýyn armandap, bar ómirin soǵan arnaǵan Álıhan Bókeıhanov, Mirjaqyp Dýlatov, Maǵjan Jumabaev sıaqty ultymyzdyń ardaqty uldarynyń asyl armany oryndalyp, Qazaqstan táýelsiz memleket boldy. Keleshek urpaq qazaq avtonomıasyn qurýǵa talpynyp, sol jolda úlken eńbek sińirgen Alashtyń ardaqtylaryn bilip ósýi qajet, – dedi Q.Ábýov.
Mýzeı uıymdastyrǵan ınovasıalyq taǵy bir joba – qazaqtyń ulttyq kıimderiniń úlgisi. Ár jyldary mýzeıge azamattardyń tapsyrǵan ótken ǵasyrlardaǵy ulttyq kıimderi az emes. Mýzeı qyzmetkerleri kıip shyqqan bul kıim úlgileriniń ásemdigi men tartymdylyǵy óz aldyna. Olar qymbat jáne taza tabıǵı materıaldan tigilgendigimen de erekshelenedi.
Sonymen qatar sharaǵa qatysýshylar elimiz Táýelsizdiginiń aıshyqty belgisi ispetti alǵashqy ulttyq valútamyz – teńgeniń shyǵý tarıhynan syr shertetin muraǵattarmen de tanysty. 1993 jyly qarasha aıynda aınalysqa engen tuńǵysh ulttyq valútamyzdyń dızaınyn jasaǵan avtorlary men banknottar týraly mýzeı qyzmetkeri jan-jaqty áńgimelep berdi.
