Almaty oblysynda qandyqol urylardyń qolynan qaza tapqan aǵaıyndylardyń deneleri búgin qara jer qoınyna tapsyryldy. Úsh birdeı azamatynan aıyrylǵan áýletpen birge kúlli el qaıǵyrdy. Kóńil aıtýshylardyń kóptigi sonsha kelgender kóshege syımady, - dep habarlaıdy Qamshy.kz KTK arnasyna silteme jasap.
Uldarynyń tiri ekenin senip, birneshe kún boıy tosqan toqsandaǵy analary bolsa aýyr qazany kótere almaı, tósek tartyp qalǵan. Qazir qandy qylmys qatysty jalǵyz aıǵaq zat retinde ańshy myltyǵy tabylyp otyr.
Úsh birdeı azamatynan aıyrylyp jylaǵan áýlettiń ashshy daýysy aýyldyń syrtyna deıin estilip tur. Tek týysqandar ǵana emes, aǵaıyndar úshin alańdaǵan alabóten adamdar da kóńil aıtýǵa kelipti. Marqumdardyń artynda qalǵan shıetteı balalary bolsa, ákeleriniń qazasyna áli de sene alar emes. Al ananyń jaıy tipti aýyr. Uldaryn toǵyz kún boıy tosqan toqsandaǵy qarıa tósek tartyp jatyp qalypty. Birden úsh baýyryn úıden shyǵararda aǵalaryna deıin talyp qaldy.
Marqumdardyń balalarynyń úlkeni – 13-te, eń kishisi-nebári bir jasta eken. Esi kirgenderi bolmasa, qalǵandary bolǵan jaıtty túsinbeı esik aldynda oınap júr. Atpaldaı úsh azamat úlken áýlettiń asyraýshysy bolǵan. Qartaıǵan áke-shesheleriniń tabanyn jerge tıgizbeı baǵyp júripti.
Tursyn Ámirbaıuly, marqumdardyń ákesi:
-Tamaq berip, baǵyp otyrǵan osy ul men kelin edi. Ul ketti, kelinniń óziniń densaýlyǵy joq, kim baǵady bizdi endi? Kimge baryp telmeńdeımin endi men?
Urylar aǵaıyndylardy ańshy myltyǵymen atyp óltiripti. Qarý qanipezerlerdiń úıinen tabylyp, ázirge jalǵyz aıǵaq zat retinde iske tirkeldi. Degenmen, marqumdardyń týystary tergeýshilerdiń o bastaǵy sylbyr qımylyna ókpeli. Óıtkeni, malshylar órtengen kólikti taýyp bergende de álgiler qazbalap ıesin izdemepti.
Adal Zarlyqan, marqumdardyń aǵasy:
-Mashınasy dúısenbi kúni 19-y kúni órtengen, keshki 9-dan 40 mınót ótkende. Sol jerdegi malshylar Uzynaǵashtyń İshki İster bólimine hbaralap aıtqan eken. Sonda nege izdemeıdi?Men adamdy taýyp bergenine, qanisherlerdi ustaǵanyna razymyn, biraq der kezinde izdemegenine ishim kúıedi. Maǵan telefon soqty, kóligimniń turǵan jerin aıtyp.
Ashynǵan aǵaıyn qandy qylmysty eki emes, birneshe adamnyń jasaǵanyna senimdi. Óıtkeni, mal tıelgen eki júk kólikpen 3 birdeı jeńil kóliktiń ilesip ketip bara jatqanyn kórgender bar. Tepse temir úzer atpaldaı 3 azamattyń aıaq-qolyn eki adamnyń baılaýy da aqylǵa qonymsyz deıdi qara jamylǵan otbasylar. Jarqynbek, Qadilbek, Muqıat esimdi úsh aǵaıyndy Uzynaǵashtaǵy mal bazarǵa 40 bas sıyrymen ketip, is-tússiz joǵalǵan. Aldymen kólikteri bos kúıinde tabylyp, keıin máıitteri qaraýsyz qalǵan qoranyń ishinen shyqqan bolatyn.
