Memleket basshysy Nursultan Nazarbaev Almaty oblysyna jumys saparyn Taldyqorǵan qalasy áýe qaqpasynyń jaǵdaıymen tanysýdan bastady. Elbasyna áýejaı men aerovokzal ǵımarattaryn qaıta jóndeý jumystary jáne óńirdiń týrısik ınfraqurylymyn damytý barysy týraly baıandaldy.

Memleket basshysy budan keıin aýyl sharýashylyǵy daqyldary men baý-baqsha ónimderiniń túr-túrin ósirip, gektar berekesin arttyrýǵa tamyljyǵan aýa raıynyń ózi úlken demeý bolatyn Jetisý óńiriniń jer baptaǵan eńbekkerlerimen kezdesip, qyzylsha jáne maıburshaq egistikterindegi jumys barysymen tanysty. Sońǵy jyldary óńirdiń qyzylsha sharýashylyǵyndaǵy jetekshilik rólin qaıta jańǵyrtý maqsatynda aýqymdy jumys qolǵa alynǵan bolatyn. Elbasyna osy rette jergilikti agrarshylardyń jetistigi Eskeldi aýdanynda ornalasqan «Nam G.N.» sharýa qojalyǵynyń jumysy arqyly usynyldy. Aýyl sharýashylyǵy daqyldaryn kútip-baptaýǵa mamandanǵan kásiporynnyń jumysymen tanysqan memleket basshysyna oblystyń agroónerkásip kesheniniń negizgi kórsetkishteri jáne qant qyzylshasy óndirisin damytý úshin qabyldanyp jatqan sharalar týraly baıandaldy.
  Oblys ákiminiń orynbasary Serikjan Beskempirov osydan eki jyl buryn aıtylǵan naqty tapsyrmalardy iske asyrý barysy týraly aıtyp berdi. Qazirgi kúni óńirdegi qant qyzylshasy egistiginiń alqaby 2500 gektardy quraıdy. Bıyl egin bitik, gektar shyǵymdylyǵy jaqsy bolmaq. Oblysta qant qyzylshasyn jınaý endi bastalǵanyn habarlaǵan ákim orynbasarynyń aıtýynsha, alǵashqy nátıjeler kóńil qýantarlyqtaı. Bir túpten alynǵan ónim 6,5-7 keliden aınalýda. Bul oblys agrarshylary gektardan 700 sentnerden astam ónim jınaıdy degen sóz. Byltyr toqtap turǵan Kóksý qant zaýyty ınvestorlardyń arqasynda qaıta iske qosylyp, qazir jańǵyrtý, qalpyna keltirý jumystary júrgizilýde.

Nursultan Nazarbaev óńir noý-haýy – elektrondy jer kartasymen tanysty. Onyń kómegi arqyly árbir qazaqstandyq óńirdegi egistik alqaptarynyń jaǵdaıymen tanysa alady. Bul sharýa qojalyqtarynyń óz qaramaǵyndaǵy egistik jerler men jaıylym, shabyndyqtardy paıdalaný tıimdiligin baqylaýyna múmkindik beredi.
Qazaqstan Prezıdenti agroónerkásiptik keshen basshylarymen kezdesti. Óńirdiń jetekshi fermerleri men agrarshylary Memleket basshysyna óz jetistikteri jaıly aıtyp berdi.
–  Almaty oblysy qant qyzylshasy, júgeri men almasy arqyly  keńinen tanymal bolyp kelgen, –  dep atap ótti  Nursultan Nazarbaev kezdesý barysynda. –  Sondyqtan osy daqyldardy egý alańyn arttyryp qana qoımaı, sapasyna da basa den qoıý qajet. Respýblıkada otandyq qanttyń úlesi nebári 10 paıyzdy quraıdy, bul kórsetkishti ulǵaıtyp, Kóksý, Eskeldi qant zaýyttaryn jańǵyrtýdy jalǵastyryp, Aqsý aýdanynda  qaıta jóndeý jumystaryn bastaý kerek.
Memleket basshysy qazir aýyl sharýashylyǵyn memlekettik sýbsıdıalaýǵa degen kózqarastyń ózgergenin atap ótti.
– Meniń sharýalarǵa aıtyp júrgen oı-piki­rimniń barlyǵynyń negizgi túıini – eńbek ónim­diligin sýbsıdıalaý qajettigi. Iaǵnı qarajat daıyn ónim óndirisi úshin bólinetin bolady, – dedi Nursultan Nazarbaev.
Elbasy óńdeý kásiporny agrarlyq tehnıkalary men aýyl sharýashylyǵy ónimderi kórmesin aralap, óńir eńbekkerleriniń jumystaryna tabys tiledi.
Memleket basshysy jumys saparynyń barysynda Tekeli taý-ken óńdeý kesheninde bolyp, kásiporynnyń jumysymen tanysty. Elbasyna óndiriske engizilgen ınovasıalyq tehnologıalar, qaıta balqytylǵan shoıyn alý arqyly temir rýdasyn óndirý jáne óńdeý jobasynyń iske asyrylý barysy týraly baıandaldy.
Memleket basshysy saparynyń aıasyn­da óńir­diń áleýmettik, mádenı ómiriniń tynys-tir­shiligi de nazardan tys qalmady. Elbasy Taldy­qor­ǵan qalasyndaǵy kópsalaly aýrýhanada bolyp,  oblystyń densaýlyq saqtaý júıesin damytý­dyń basty baǵyttary jáne tıisti memlekettik baǵdarlamalardyń iske asyrylý barysymen tanysty. Prezıdentpen kezdesýde medısına qyzmet­kerleri júrgizilip jatqan áleýmettik saıa­satqa qoldaý bildirip, densaýlyq saqtaý salasyna qamqorlyǵy úshin alǵystaryn aıtty. Oblys ortalyǵyndaǵy 300 adamǵa shaqtalǵan, jańa qu­ryl­ǵy­larmen jabdyqtalǵan kópsalaly aýrýhana stasıonarlyq, stasıonardy almastyratyn jáne joǵary mamandandyrylǵan medısınalyq kómek kórsetedi. 
Elimizdiń erteńi – jas urpaqtyń bilimdi, jan-jaqty jetilgen azamat bolyp qalyptasýy jolynda jasalyp otyrǵan qamqorlyqtyń bir kórinisi retinde Taldyqorǵan qalasynda jańadan salynyp, paıdalanýǵa berilgen Oqýshylar saraıyn aıtýǵa bolady. Jalpy aýdany 13 myń sharshy metrden asatyn ǵımarattyń ınfraqurylymy sheberhana, zerthana, kórme jáne májilis zaldaryn, sondaı-aq mýzeı, medıateka, dybys jazý stýdıasy men observatorıany qamtıdy.
Jas órkenniń qıalyna qanat bitirip, asqaq arman men asqaraly bıikterge umtyldyratyn osynaý ortalyqqa Memleket basshysy arnaıy at basyn buryp, bıologıa, fızıka kabınetterin, tehnıkalyq shyǵarmashylyq kórmesin, horeografıa jáne úlken konsert zaldaryn aralap kórdi, kórkemóner galereıasyndaǵy sýretter ekspozısıasymen tanysty. Sondaı-aq balalardyń án-bı ónerin tamashalaǵan Elbasy jetkinshektermen jáne olardyń ata-analarymen áńgimelesip, shyǵarmashylyq tabys pen baq-bereke tiledi.
Sońynda Memleket basshysy Oqýshylar saraıyna jaıly avtobýs tartý etti.
Budan keıin Elbasy Jastarǵa qyzmet kórsetý ortalyǵynda bolyp, óńirdegi jastar saıasatynyń negizgi baǵyttarymen jáne basty memlekettik baǵdarlamalardyń iske asyrylý barysymen tanysty. Ortalyq jastar ómiriniń keń aýqymdy máselelerin qamtıdy, sonyń ishinde turmysy nashar jáne kópbalaly otbasylarǵa kómek kórse­tedi.
Sonymen qatar Memleket basshysy kópbeıindi zaldy aralap kórdi, onda Taldyqorǵan men Nurkent qalalary damýynyń bas josparlarymen, sondaı-aq Jarkent – Qorǵas aglomerasıasy damýynyń keshendi jobasymen tanysty.
Memleket basshysy qala turǵyndarynyń mádenı-kópshilik demalysy úshin barynsha qolaıly jaǵdaı jasaýdyń mańyzdylyǵyna nazar aýdardy. Osy rette Nursultan Nazarbaev qalalyq «Jastar» saıabaǵyndaǵy jańartý jáne abattandyrý jumystarynyń barysymen tanysyp, jurtshylyq ókilderimen kezdesti.
– Oblystyń shekara boıynda ornalasýy eko­nomıkanyń kólik-logıstıka jáne elektr energetıkasy salalaryn damytý qajettigin talap etedi. Búginde memlekettik baǵdarlamalardyń iske asyrylyp, meniń tapsyrmalarymdy oblys ákiminiń tıanaqty oryndaýynyń arqasynda bul salalar qarqyndy damýda. Óńirdiń áleýmettik baǵdarlamalardy júzege asyrýdaǵy tabystaryn da aıtpaı ketýge bolmaıdy. Sonymen birge halqymyzdyń táýelsizdik jyldaryndaǵy basty jetistiginiń taǵy biri – beıbitshilik pen ultaralyq kelisimniń saqtalýy dep sanaımyn, – dep atap ótken Nursultan Nazarbaev oblys jurtshylyǵyna zor densaýlyq jáne eńbekterine tabys tiledi. 
Óz kezeginde qala turǵyndary oblysqa qam­qorlyǵy jáne halyqtyń ál-aýqatyn arttyrýǵa baǵyttalǵan tıimdi memlekettik saıasaty úshin Elbasyǵa rızashylyqtaryn bildirdi.
Memleket basshysy Almaty oblysyna jumys saparynyń qorytyndysy boıynsha buqaralyq aqparat quraldarynyń ókilderi úshin brıfıń ótkizdi.
Elbasy óziniń 2014 jyly bergen tapsyr­malary­nyń ýaqtyly oryndalyp jatqanyn atap ótti.
– Almaty oblysy – elimizdiń kórikti óńiriniń biri jáne aýyl sharýashylyǵy daqyldarynyń kóptegen túrin óndiretin asa mańyzdy aımaq, – dedi Nursultan Nazarbaev.
Elbasy qalanyń abattandyrylýy jaqsara túskenine toqtaldy.
– Jańa áleýmettik ınfraqurylym nysan­da­­rynyń paıdalanýǵa berilýi elimizdiń táýel­sizdiginiń 25 jyldyǵy qarsańynda qala tur­ǵyndary úshin tamasha syılyq boldy. Indýstrıa­landyrý baǵ­darlamasy men «Nurly jol» baǵdarlamasynyń odan ári iske asyrylýy ekonomıkamyzdyń damýyna, soǵan oraı halyqtyń turmys deńgeıiniń artýyna septigin tıgizedi, – dedi Memleket basshysy.
Iá, shybyq qadasań – jaıqalǵan jasyl jelekke, dán sepseń – qaýlaı ósip, mol yrzyqqa aınalar jeri jomart, tabıǵaty janǵa jaıly Jetisý óńiri eńbekkerleriniń elimizdiń áleýmettik-ekonomıkalyq damýyna qosar ózindik úlesi mem­le­kettik baǵdarlamalardyń oıdaǵydaı júzege asy­rylýynyń nátıjesinde eselene túspek. 

Rymtaı SAǴYNBEKOVA