Memlekettik organdardyń birazynda qaǵazbastylyqtyń shyn máninde mazmundyq ólshemi joq. Bul týraly búgin Ortalyq komýnıkasıalar qyzmetindegi baspasóz máslıhatynda Astanadaǵy Memlekettik qyzmet salasyndaǵy Óńirlik habtyń basqarýshy komıtet tóraǵasy Álıhan Baımenov málimdedi, - dep habarlaıdy Qamshy.kz QazAqparatqa silteme jasap.
«Memlekettik qyzmetkerlerdiń jumys ýaqyty aıaqtalsa da, keńsede túnge deıin qalýy - memlekettik organdardyń menedjmentindegi ózekti máseleniń biri. Bul rette birneshe másele bar. Birinshiden, laýazym ıeleri arasynda jaýapkershilikti shekteýdi jetildirý kerek. Mınıstrliktiń ishinde kim strategıalyq baqylaýmen aınalysady, kim kúndelikti basqarýmen aınalysady degen mınıstr orynbasarlary men jaýapty hatshy arasyndaǵy arajikti odan ary naqtylaý kerek. Ekinshiden, memlekettik organdardyń birazynda áli de qaǵazbastylyq basym jáne osy qaǵaz aınalymyn taldaıtyn bolsańyz, onyń birazy ózinen ózi týyndaǵan, shyn máninde mazmundyq ólshemi joq qaǵazdar. Sondyqtan qadaǵalaý ári baqylaý júıesinde joǵary organnyń tómengi organdy qadaǵalaǵandy jaı ǵana formaldy emes, strategıalyq nátıjelerge qol jetkizýge ekpin qoıylýy kerek. Bul álemdik úderis»,-dedi Á. Baımenov.
Onyń sózine qaraǵanda, keıbir laýazym ıeleri jumystan keıin jınalystar ótkizgendi unatady. Osy rette bul jınalystardyń da nátıjeliligine nazar aýdarý qajet.
«Memlekettik organdardyń basshylar úshin menedjment, onyń ústine jobalaý menedjmenti, ýaqyt menedjmenti sekildi biliktilikterin kóterý kýrstaryn ótkizý kerek dep oılaımyn. Eger memlekettik qyzmetkerler túngi saǵat 10-11-ge deıin jumys isteıtin bolsa, olardyń jumys ýaqytyndaǵy eńbek ónimdiligi kúrt tómendeıtinin zertteýler anyq kórsetip otyr. Olar 6-7 saǵatta jasaıtyn jumysyn atqarýǵa qaýqarsyz bolady. Ol úshin qyzmetkerlerdi naqty iske jumyldyra bilý kerek. Bul memlekettik organdardyń ishindegi menedjmentti jetildirýge qazir basty nazar aýdarý kerek ekenin jáne memlekettik qyzmettegi korporatıvtik mádenıetti jetildirýdiń mańyzdylyǵyn ańǵartýda. Sonymen qatar qaramaǵyndaǵy sarapshylardyń bilimin sheshim qabyldaǵanda durys paıdala bilýge mán berý kerek», - dedi ol.
Sóz sońynda Á. Báımenov joǵaryda atalǵan qadamdar arqyly qajetti júıelerdi jetildirý nátıjesinde memlekettik qyzmettiń bedelin kóterýge yqpal etetinin atap ótti.
