Premer-mınıstrdiń orynbasary – aýyl sharýashylyǵy mınıstri Asqar Myrzahmetovtyń tóraǵalyǵymen selektorlyq rejımde Jambyl oblysy aýyl sharýashylyǵy salasynyń aǵymdaǵy jaı-kúıi men problemalyq máselelerine arnalǵan otyrys ótkizildi. Bul týraly Aýyl sharýashylyǵy mınıstrliginiń baspasóz qyzmeti habarlady.
Jıynǵa Aýyl sharýashylyǵynyń vıse-mınıstrleri men vedomstvalyq komıtetter jáne departamentter basshylary, Jambyl oblysy ákiminiń orynbasary men oblystyq aýyl sharýashylyǵy qurylymdarynyń qyzmetkerleri jáne de «QazAgro» ulttyq basqarýshy holdıńi» AQ enshiles uıymdarynyń ókilderi qatysty.
«Elimizdiń barlyq óńirlerinen kún tártibinde turǵan agroónerkásiptik keshenniń ózekti problemalyq máselelerin jınaqtadyq. Osy materıaldardyń negizinde arnaıy keste túzilip, búginnen bastap ár aımaqtyń túıtkilderin jeke dara beınekonferensıalyq baılanys arqyly qaraýdy bastaımyz. Bul sharalardyń basty maqsaty – máselelerdi kóterip qana qoımaı, naqty sheshimder qabyldaý jáne Aýyl sharýashylyǵy mınıstrligi men aımaqtyq atqarýshy organdar arasynda tıimdi qarym-qatynas júıesin qalyptastyrý bolyp tabylady», – dep atap ótti A.Myrzahmetov.
Jańa formattaǵy bul úrdis Jambyl oblysynyń máselelerin talqylaýdan bastaldy.
Beınebaılanys barysynda jambyldyqtar tarapynan birinshi kezektegi másele retinde mal sharýashylyǵy salasyna sýbsıdıanyń jetispeýshiligi, tıimdiligi aıtyldy. Olardyń habarlaýynsha, aǵymdaǵy jyly Jambyl oblysynyń mal sharýashylyǵyn sýbsıdıalaý baǵdarlamasyna qosymsha 2,1 mlrd. teńge, al AÓK sýbektilerine ınsvestısıalyq sýbsıdıalaý úshin 2,8 mlrd. teńge qajet.
Buǵan jaýap retinde, Aýyl sharýashylyǵy mınıstrliginiń ókilderi ekonomıkalyq ósim men 2016 jylǵy jumyspen qamtý aýqymyn ulǵaıtý aıasynda mınıstrliktiń oblys ákimdikterimen birlesip mal sharýashylyǵyn damytýdy sýbsıdıalaý úshin qosymsha 30,2 mlrd. teńge somasynda qarjy bólý boıynsha búdjettik suranym ázirlegenin atap ótti. Onyń ishinde Jambyl óńirine 5,7 mlrd. teńge bólý qarastyrylǵany jáne de suranymnyń Ulttyq ekonomıka, Qarjy mınıstrlikteri tarapynan qoldaý taýyp otyrǵandyǵy aıtyldy.
Sondaı-aq, Jambyl oblysy sharýalaryn mazalap otyrǵan taǵy bir túıtkil – lızıńke tehnıka berý erejesin elep-eksheý máselesi qyzý talqylandy. Óńir ókilderiniń pikirine súıensek, ár óńirdiń ózindik erekshelikterine sáıkes lızıńtik talaptardy Qazaqstan boıynsha biryńǵaı qoldanýǵa kelmeıdi. Máselen, bir tehnıkaǵa baılanysty jerdiń kólemi ońtústikte soltústikke qaraǵanda áldeqaıda tómen. Sondyqtan da osyny eskerý kerek. Geografıalyq erekshelikterge qaraı munda kólem men kórsetkishterge baılanysty birqatar qıyndyqtar bar.
Óz kezeginde syndarly usynystardy qabyldaýǵa ázir ekendigin atap ótken aýyl sharýashylyǵy mınıstri, óz qyzmetkerlerine lızıńtik talaptardy ár óńirdiń ereksheligine qaraı qaıta qarastyrýǵa tapsyrma berdi.
Taǵy bir talqylanǵan ózekti másele – malǵa arnalǵan nómirlengen qulaq belgileriniń jetkizilýi boldy. 2015-2016 jyldardyń ótinimi boıynsha suralǵan syrǵalar baǵyttalǵan jerine ýaqytyly jetkizilmegen.
Bul oraıda A.Myrzahmetov jaýapty qurylymdarǵa atalǵan olqylyqtyń aldaǵy ýaqytta qaıtalanbaýyn qatań eskertip, mundaı belgilerdiń qory jasalýyn jáne de ár jyldyń 1 naýryzyna deıin syrǵalardyń tıisti oryndarǵa jetkizý mindetin qoldanystaǵy erejege engizýdi tapsyrdy.
Sondaı-aq otyrysta Jambyl oblysynyń aýyl sharýashylyǵyna baılanysty basqa da birqatar máseleler qaraldy.
Jıyn sońynda Jambyl oblysy ákiminiń orynbasary Abdaly Nuralıev barlyq quzyrly taraptardyń bir ústelde bas qosyp, ortaq máselelerdi talqylaýǵa múmkindik beretin mundaı tıimdiligi joǵary jańa formattaǵy beınebaılanystyń óte qajet ekendigin basa aıtyp, alǵys bildirdi.
Botagóz ÁBDİREIQYZY, Ekonomıka gazeti
