«Qazaq gazetteri» men «Jas órken» jaýapkershiligi shekteýli seriktestikteriniń ujymdary jańadan kóship barǵan ǵımaratynda tusaýkeser rásimin ótkizdi. Saltanatty jıynǵa qazaq baspasóziniń ardagerleri, Seriktestikke qarasty basylymdaryń eńbek ujymdary qatysty.
Alǵashqy quttyqtaý sóz «Qazaq gazetteri» JSHS-niń Bas dırektory – Redaktorlar keńesiniń tóraǵasy Jumabek Kenjalınge berildi. J.Kenjalın áriptesterin osynaý aıtýly kúnmen quttyqtaı otyryp, ujymnyń «Qazaqstan» teleradıokorporasıasynyń ǵımaratyna qonys aýdarýy Aqparat jáne komýnıkasıalar mınıstrliginiń tikeleı qoldaýynyń arqasynda júzege asqanyn jetkizdi. Osy oraıda Qazaqstan Respýblıkasy Aqparat jáne komýnıkasıalar mınıstri Dáýren Abaevtyń joldaǵan Quttyqtaý hatyn oqyp berdi.
Budan biraz buryn jańa qyzmetke taǵaıyndalysymen mınıstr óz vedomstvosyna qarasty mekemeler men uıymdarda bolyp, onda sheshýin kútken máselelerdi kóterip, ujym múshelerimen alqaly keńes qurǵan bolatyn. Sondaı bir keńestiń sáti «Qazaq gazetteri» jáne «Jas órken» Seriktestikterinde de ótip edi. Salıqaly áńgimede mınıstr ujymdar otyrǵan ǵımaratty aralap kórip, ónimdi jumys isteý úshin shyǵarmashylyq ujymdarǵa tıisti jaǵdaı jasalý qajettigine nazar aýdardy. Sóıtip, jýrnalıserdiń bolashaqta jańa qonysta bolatyndyǵyna, munyń ózi ónimdi eńbektiń bir kepili ekendigine toqtaldy. Mınıstr aıtqan sózinde turdy. Mine, sonyń nátıjesinde eki ujym Almatydaǵy Jeltoqsan kóshesiniń boıynda ornalasqan radıo úıiniń keńse bólmelerine qonystandy. Tıisti ákteý-jóndeý jumystarynan soń ýaqyt ozdyrmaı, jańa mekenge jaıǵasqan jýrnalıser ejelgi dástúr boıynsha munda tusaýkeser ótkizýdi de umytpady.
Mınıstrdiń Quttyqtaý hatynda «Qazaq gazetteri» JSHS-ne qarasty «Ana tili», «Ekonomıka», «Aqıqat», «Mysl», «Ýıǵýr avazı», «Úrker» basylymdarynyń el rýhanıatyndaǵy alatyn orny, Elbasynyń syndarly saıasatyn júzege asyrýǵa, elimizdiń rýhanı-mádenı bolmysyn qalyptastyrýǵa qosyp jatqan úlesteri, sonymen qatar halqymyzdyń birligin nyǵaıtý, Táýelsizdigimizdiń tuǵyryn bekitý jolyndaǵy eseli eńbekteri aıryqsha atap ótilgen.
Hattyń sońy: «El damýyna ólsheýsiz úles qosyp kele jatqan ulttyq baspasózge qoldaý kórsetý – Aqparat jáne komýnıkasıalar mınıstrligi úshin kókeıkesti másele. Sizder qyzmet etetin basylymdardyń mınıstrliktiń tikeleı yqpal etýimen jańa ǵımaratqa ornalasýy sonyń bir mysaly. Osy jańalyq shyǵarmashylyq ujymnyń tyń izdenisterine bastaý bolaryna senimim mol. Qonystaryńyz qutty bolsyn! Elge qyzmet etý jolynda úlken jetistikterge jete berýlerińizge shynaıy tilektestigimdi bildiremin!» degen izgi lebizge toly sózdermen aıaqtalǵan.
Sonymen qatar Jumabek Omaruly Qazaqstan Respýblıkasy Prezıdenti Baspasóz hatshysynyń orynbasary, QR UǴA korespondent-múshesi, fılologıa ǵylymynyń doktory, profesor Baýyrjan Omarovtyń atynan kelgen Quttyqtaý hatty da oqyp berdi.
Saltanatty jıynda «Jas órken» jaýapkershiligi shekteýli seriktestiginiń bas dırektory Júsipbek Qorǵasbek, qazaq baspasóziniń ardagerleri Sarbas Aqtaev, Orazaqyn Asqar, «Qazaqstan» teleradıokorporasıasynyń Almaty qalasyndaǵy fılıaly dırektorynyń orynbasary Qalamqas Hasenova sóz sóıledi. Tusaýkeser sharasynda «Baldyrǵan» jýrnalynyń qyzmetkeri Qul-Kerim Elemes, jas ónerpaz, aqyn Amangeldi Seıithan dombyramen án saldy.
Jańa qonystyń tusaýkeser lentasyn otandyq jýrnalıskanyń maıtalmandary – S.Aqtaev, O.Asqar, Iý.Azamatov, S.Qalıuly qıdy. Sońynan shashý shashylyp, fýrshet uıymdastyryldy.
Dáýirjan Tólebaev
