Azattyq radıosyna ózin Jańaózen ereýili kezinde shetke ketken bosqyn retinde tanystyrǵan áıel adam Polshadaǵy Zgerj qalasynyń túbindegi bosqyndar lagerinde turyp jatqanyn aıtty.

Maýsymnyń 18-i kúni Azattyq radıosymen habarlasqan Dına Babıshevanyń aıtýynsha, Polshadaǵy bosqyndar lagerinde 10-15 qazaq otbasy bar. - Myna jerde Jańaózennen kelgender bar. Olar – Jańaózen oqıǵasynan keıin qashqan azamattar. Bosqyndardyń arasynda munaıshy bolyp jumys istegenderi bar. Olardyń keıbiri Reseı arqyly qashyp shyqqan, - dedi Dına Babısheva. TÚRKIA ARQYLY QASHYP SHYǴÝ 50 jastaǵy Dına Babıshevanyń aıtýynsha, olar bosqyn mártebesin alý úshin Varshavadaǵy BUU-nyń bosqyndar jónindegi agenttigine qujattaryn tapsyryp qoıǵan. - Bizge alty aıdyń ishinde suhbat alynyp, habar beriledi dep aıtqan», - dedi qazaq bosqyny. Dına Babısheva jeltoqsan aıynda Túrkıa arqyly Polshaǵa ótkenin aıtady. - Jeltoqsan aıynda Qazaqstannan qashyp, Túrkıaǵa keldik. Onda musylmandarǵa kómektesetin bir uıym bar eken. Solar Ýkraınaǵa deıin bılet alyp berdi. Sol jerden Polshaǵa qaraı bet aldyq. Aqpannyń 14-inde osy jerge keldik. KERİ DEPORTASIALANÝ QAÝPİ Aqtaý qalasynan qashqan Dına Babıshevanyń aıtýyna qaraǵanda, onyń kúıeýi Bekbolsyn Qojanazarov «Qarajanbasmunaı» kompanıasynda jumys istegen. Onyń aıtýynsha, munaıshylardyń ereýiline qatysqan kúıeýi tamyz aıynda is-tússiz joǵalyp ketken. - Mılısıadan surasam, «bizde ondaı adam joq, bizge ondaı adam túsken joq» dep aıtty. Kúıeýimniń qaıda ekenin bilmeımin, - dedi ol.

​​ Dına Babıshevanyń habarlaýynsha, juma kúni (15 maýsym) Polshanyń quqyq qorǵaý organdarynyń qyzmetkerleri bosqyndar lagerinde tekserý júrgizgen. «Osy reıdten keıin deportasıalanýymyz múmkin dep qaýiptenip otyrmyz» dedi qazaq bosqyny. Babıshevanyń aıtýynsha, lagerdegi ózge qazaq bosqyndary ózderi týraly aqparat berýden bas tartyp otyr, sebebi bastaryna qaýip tónedi dep qorqady. Al Azattyq radıosynyń Polshadaǵy bosqyndar lageriniń ákimshiligimen baılanysý áreketteri ázirshe sátsiz boldy. 2011 jylǵy jeltoqsannyń 16-sy Jańaózen qalasynda polısıa men arnaıy jasaq ereýildep turǵan munaıshylarǵa oq atqan edi. Resmı málimetterge sáıkes, Jańaózen oqıǵasynda 16 adam qaza taýyp, júzden astam adam jaralanǵan. Tómendegi jergilikti turǵynnyń kóp qabatty úı terezesinen túsirgen YouTube vıdeosynda Jańaózendegi polısıa men arnaıy jasaqtyń is-áreketi kórinedi. Bul beınejazba qandy oqıǵanyń sıpaty anyq kóringen tarıhı derekke aınaldy.

Saıda BABAMQOJA

«Azattyq radıosynyń» saıtynan alyndy.