Onyń esimi Aıjan. Jasy otyzdan assa da ómirlik serigin áli kezdestirmegen ol qazirgi qoǵamda kári qyzdarǵa degen synnyń kóbeıip ketýine baılanysty óz oıyn jaıyp saldy.
"Iá, bálkim meni de bireýler kári qyz deıtin shyǵar. Biraq ózimdi kári qyz dep eseptemeımin. Jalpy turmysqa shyqpaǵan qyzdardy bulaı atap kemsitýdiń keregi joq. Qaı boıjetken ómirlik joldasyn taýyp, balaly-shaǵaly bolyp, bir úıdiń kelini atanǵysy kelmeıdi deısiz? Bireýler "qyzdar kúıeýge tımeı qalsa ózderi kináli. Jaqsy jigitterdi mensinbeı júrip alady" dep, jazǵyryp jatady. Bul da durys emes. Mende mysaly, bireýdi mensinbeý degen bolǵan emes.
Stýdent kezimde bar ýaqytymdy oqýǵa arnadym. Basqa qyzdar jigit izdep, 4-kýrstyń sońynda kúnde "jasymyz ótip barady, bireýdi taýyp keteıik" dep, neshe túrli jigittermen tanysyp, qydyryp júrdi. Al men bolsam olarǵa ermeıtinmin. Olardy buzylǵan qyz dep oılaıtynmyn. Búgin qarasam solar tórt-bes balanyń anasy atanyp, jap-jaqsy áıel bolyp otyr.
Qazir endi bar nıetimdi jumysqa aýdarǵandyqtan ba, kúıeýge shyǵý qajettigine asa mán bermeımin. Jalpy kúıeýge shyǵý jóninde nege qyz oılaýy kerek? Bul taǵdyrdyń jazýymen bolatyn is emes pe? Bireý erte, bireý kesh degendeı, boıdaq qyz áıteýir kúnderdiń bir kúninde serigin kezdestirer. Al kezdespese, ol da mańdaıǵa jazylǵan is bolar.
Árıne, meniń kúıeýge shyqqym keledi. Bireýler "Áli kúnge kúıeýge shyqpaı neǵyp júrsiń? dep jatady. Ol meniń qolymdaǵy is emes. Múmkin ýaqyty áli kelmegen shyǵar. Berer jaýabym osy.
Aınalamda jaqsy azamattar kóp. Men jasym ósken saıyn adamdardy barynsha jaqsy kóretin boldym. Buryn meılinshe tuıyq, kisilerden alshaq júretin edim. Qazir ortam úıretti me, adamdarsyz tura almaımyn. Maǵan meıirim shýaǵyn tógip turatyn jigitterdi kórgen saıyn solardyń boıynan ózimniń bolashaq jaryma tán qasıetterdi izdeımin. "Kúıeýim osyndaı bolsa eken" dep oılaımyn. Biraq bireýdi otbasynan buzyp, áıeli bar erkekke jabysý oıymda joq. Aınalamdaǵy meni syılaıtyn er azamattarǵa meniń de syı-qurmetim erekshe. Al, ómirlik joldas tabý ol qyzdyń qolyndaǵy nárse emes, taǵdyrdyń isi.
Aıǵanym Birtýar
