Búgin Qazaqstan men Reseıdiń XIII óńiraralyq yntymaqtastyq forýmy barysynda Elbasy Nursultan Nazarbaev reseılik kompanıalardy qazaqstandyq kásiporyndardy jekeshelendirýge qatysýǵa shaqyrdy, - dep habarlaıdy Qamshy.kz QazAqparatqa silteme jasap.

«Qazirgi ýaqytta biz aýqymdy jekeshelendirýdiń kezekti kezeńine kiristik. Memlekettiń maqsaty-ekonomıkada kásiporyndardyń 15 paıyzdaıyn ǵana qaldyrý. Básekelestik ortaǵa jalpy somasy shamamen 10 mlrd. dollardy quraıtyn 800-ge jýyq memlekettik kásiporyn beriledi. Satý qarapaıym aýksıonnnan bastap, strategıalyq seriktestikke naqty satýǵa deıingi ártúrli ádispen júrgizilýde. Reseılik kompanıalar bul sharaǵa belsendi qatysady dep oılaımyn», - dedi Nursultan Nazarbaev.

Osy rette Memleket basshysy Qazaqstan Dúnıejúzilik banktiń bıznes júrgizý jeńildigi jónindegi reıtıńinde 41-shi orynda turǵanyn aıtty.

«Biz ekonomıkany kezeń-kezeńimen jańǵyrtýdy jalǵastyra beretin bolamyz», - dedi Elbasy.