Kárim Másimov Ulttyq qaýipsizdik komıtetiniń basshysy bolǵan kúni myna oılarymdy bir azamattarǵa aıtyp edim, endi kópshilikpen de bóliskim kelip otyr.

Nursultan Nazarbaev Islam Kárimov ólgennnen keıin kóp uzamaı Kárim Másimovty UQK tóraǵa etip taǵaıyndady. Onyń negizgi sebebi- UQK kúsheıtý arqyly Prezıdent óziniń muragerin saqtaýdy jáne oǵan básekeles bolýy múmkin adamdardy saıası sahnadan alastaýdy kózdeıdi.

Ózbekstanda Ulttyq qaýipsizdik qyzmetiniń (SNB), onyń basshysy Rýstam Inoıatovtyń arqasynda Shavkat Mırzıóev prezıdenttik orynnyń jalǵyz úmitkeri bolyp otyr dep esepteımin.

Kárim Másimov UQK barǵannan keıin kóp uzamaı búdjetten quqyq qorǵaý organdaryna qosymsha 70 mlrd. teńge bólindi.

Qysqasha aıtsaq, osy jyldyń 02 qyrkúıeginde Islam Karımov kóz jumdy, 08 qyrkúıekte Kárim Másimov UQK basshylyqqa taǵaıyndaldy, 13 qyrkúıekte osy salaǵa  qosymsha 70 mlrd. teńge aqsha bólindi.

Meniń ishki esebim boıynsha bolashaqta prezıdenttikke úmitker bolýy múmkin-aý degen adamdar týraly jaǵymsyz aqparattar (kompromat) taratý isi Kárim Másimov taǵaıyndalǵannan 2-3 aı ótkennen keıin bastalýy kerek bolatyn. Biraq, Kárim aka ol isti tezirek bastaýdy jón kórgen sıaqty ma dep qaldym.

Onyń bir sebebi, sońǵy kúnderi «Karavan» gazeti Imanǵalı Tasmaǵambetovtyń Qorǵanys mınıstri bolyp turǵan kezdegi kemshilikterin tizip, onyń úlken qyzy Ásel Tasmaǵambetova men kúıeýi Keńes Raqyshevtyń baılyǵy týraly jaza bastady.

Ári qaraı osyndaı aqparattyq shabýyldar taǵy birneshe adamǵa baǵyttalýy múmkin.

Eń negizgisi Kárim Másimov Prezıdent usynatyn muragerdiń básekelesterin joıýmen ǵana shektele me, álde «H» saǵatta ózi negizgi básekeleske aınala ma? Másele osynda...

Bul árıne meniń jeke pikirim. Men qatelesken bolýym da múmkin. Sizder qalaı oılaısyzdar?

Maqsat İlıasulynyń Feısbýktegi paraqshasynan alyndy