Alash jurtynyń júreginde «Er Jánibek» bolyp uıalaǵan bahadúrdiń batyrlyqpen birge, naǵashysy Qaz daýystyQazybek bıden daryǵan sheshendik óneri de bolǵan. Er Jánibektiń Shaıqasta tulpary boldyryp qalǵan Abylaı hanǵa astyndaǵy kók dónenin túsip bergen kóregendigi; jekpe-jekte qalmaqtyń eki batyryn jeńgen erligi;Qarakereı Qabanbaı, Qanjyǵaly Bógembaılarmen tize qosa otyryp, jońǵar shapqynshylyǵyna qarsy soǵystyń aıaǵyna deıin shaıqasqan tabandylyǵy; Kishi júz hany Ábilqaıyr Reseı ımperıasynyń bodandyǵyn qabyldaǵan almaǵaıyp tusta kereı taıpasyn bastap, Syr boıynan údere kóship, Qalba taýyna, odan ary Altaı asyp,Shyńjań ólkesine qarasty baıyrǵy mekenine aparyp ornalastyrǵan kósemdigi el júregine ornap ketkeli qashan!?
Azattyq týy jelbirep, alyptarymyz qaıta orala bastaǵan tusta, Er Jánibek jóninde halyq júreginde saqtalǵan altyn qazyna qaǵaz betine molynan túse bastady. Al, qazirgi qytaı terıtorıasynda ómir súrip jatqan qazaqtar bul jumysty tipti erterek, sonaý sekseninshi jyldardyń basynda qolǵa alyp úlgirgen bolatyn. Olar eki serıaldy fılm túsirdi, batyr tulǵasyn somdaǵan kólemdi romandar, zertteý eńbekter jazyp shyǵardy.
Esimi ańyzǵa aınalǵan qasıetti tulǵanyń atyna elimizde qoǵamdyq qor qurylyp, 290 jyldyǵy sol qordyń jebeýimen, azamattardyń atsalysýymen dúrkirep ótkeni esimizde. Qalbataý óńirinde eńseli eskertkishi turǵyzylyp, Almaty qalasynyń Alataý aýdanynan bir kóshege esimi berilgen bolatyn.
Mine, sodan beri taǵy bir on jyl zýylap óte shyǵypty. Er Jánibekke degen halqynyń yqylasy tipti arta túskeni baıqalady.
Sol qalyptasqan daǵdy boıynsha alys-jaqyndaǵy batyr urpaqtary Almatyda bas qosyp, endi uly tulǵanyń úsh júz jyldyǵyn atap keń kólemde ótkeli jatyr. Osy arada astyn syzyp aıtatyn bir sóz, Er Jánibek urpaǵy batyr baba toıyn bul joly da óz qarjylaryna ótkizgeli otyr. Qysqasy, úkimettiń esigin qaǵyp, basshylardyń mazasyn almaǵan. Bir Jánibek emes, Ospan batyrdyń júz jyldyǵy, Tańjaryqtyń 110 jyldyǵy, Qajyǵumardyń asy da osylaı atalyp ótkenin biz jaqsy bilemiz. Jaratqannyń ár kúnin eńbekpen ótkerip, ashshy terimen tapqan tabystarynyń bir bólgin ortaq qorjynǵa salyp, berekeniń, jomarttyqtyń úlgisin kórsetip otyrǵan osynaý aǵaıyndarǵa alǵystan basqa ne aıtasyń, tek azattyq ańsaǵan babalar rýhy jebep, jelep júre bersin deısiń!
Dúbirli toıdyń baǵdarlamasyna qaraǵanda, Er Jánibekke arnalǵan bul shara byltyr ǵana Kókshetaýda atalyp ótilgen Abylaı hannyń 300 - jyldyǵynan asyp túspese, kem soǵatyn túri joq. Aqyldy azamattar alys-jaqynnan kelgen aǵaıynnyń basyn qosyp, Batyr babamyzǵa mamyrdyń 11-i kúni túste Almatydaǵy «Rixos Almaty» meıramhanasynda quran oqytyp, as bermek. Ertesi (12- mamyr) keshte qazaq óner juldyzdarynyń qatysýymen Respýblıka Saraıynda «ELİNE URAN BOLǴAN ER JÁNİBEK» atty gala konsert ótedi. Maýsym aıynyń on toǵyzynda (06.19) Astanada halyqaralyq ǵylmı-tájirıbelik konferensıa bolady. Konferensıaǵa qatysýshy qonaqtar ertesi kúni Qalbataýǵa jolǵa shyǵady. Toıdyń dýmandy tusy 21-maýsynan bastap Qalbataýda jalǵasady. Munda da kók qasqa taıǵa bata jasalyp, alaman báıge, aqyndar aıtysy, qazaq kúresinen top jarǵandar qomaqty júldemen marapattalady. Teatrlanǵan qoıylym bolady. Jyl saıyn SHQO-da ótip kele jatqan «Shyǵys shynary» da bıyl Er Jánibektiń mereı toıyna arnalypty. Bas báıgege avto kólik tigilipti. Qysqasy, bul shara jyl aqyryna deıin jalǵasyn tabady.
Aınalamyzda myltyq daýysy estilip, dúnıeniń dúbiri kóbeıip, esil babalarymyz bilektiń kúshi, naızanyń ushymen qorǵap qalǵan baıtaq dalamyzǵa pıǵyly teris jandar taǵy da kóz suǵyn qadap, qısynsyz sózge erik berip otyrǵan tusta ótkizilip jatqan Er Jánibektiń 300 jyldyǵy, árıne, erikkenniń ermegi, ataq shyǵarýdyń aılasy emes, naǵyz erliktiń toıy, berekeniń uıtqysy bolmaq degen oıdamyz.
“Qamshy” silteıdi
