Qyzyq-qyzyq oılar keledi eken. Qyzyq emes, buzyq oılar keledi eken. Úndemeýge de bolmaıdy. Birdeńe deýge de bolmaıdy. Úndeseń, júndeıdi. Úndemeseń, qul deıdi. Qazaq bir birine senbeıtin boldy. Jaqsyny kórmeıtin boldy. Jamanǵa shóldeıtin boldy. Jan ashymaıtyn boldy, meıirimi tasymaıtyn boldy. Satatyn boldy, qarsy shyqsań, atatyn boldy. Ala kózdene órekpıtin boldy, jaqsy iske birikpeıtin boldy. Adam ólse, qaıǵyrmaıtyn boldy, jaqsy men jamandy aıyrmaıtyn boldy. Jaǵympaz unaıtyn boldy, al, isker qulaıtyn boldy. Qulaǵany turmaıtyn boldy. Aqıqatty aqymaq keshpeıtin boldy, aqyldy adam óspeıtin boldy. Baýyr tas júrek boldy, keler kún tas túnek boldy. Dókeıler qol almaıtyn boldy - armanyń oryndalmaıtyn boldy. Nesıe kóp, keshirim joq. Jemeıtin boldy, asaıtyn boldy, jerdiń qoınaýy bosaıtyn boldy. Aılalar myń túrli boldy, kedeı bolý birtúrli boldy. Bir kún mas boldyń, on kún ash boldyń. Al, bireý toıyp sekirdi, edendi oıyp sekirdi. Astyna kilem jaıyp sekirdi. Al, sen tońyp sekiresiń, bet-júziń ońyp sekiresiń. As bolsa kekiresiń, joq bolsa, bekinesiń. Nege aram bola almaımyn dep qarǵanyp ókinesiń. Imannan jumsaq dıvan artyq. Qıǵannan - jıǵan artyq. Jetimniń aqysyn ýystap alatyn boldyń, qyzmetke týysty alatyn boldyń. Osynyń bárine ózimdi kináli sanap, qaraptan qarap qýystanatyn boldym...

Abai.kz