Búgin qazaq eliniń táýelsizdigi úshin kúresken Keıki batyrdyń bas súıegi tańǵy 5:30-da Astanaǵa jetkizildi. QR Mádenıet jáne sport mınıstrligi osy máselege qatysty arnaıy jumys tobyn qurǵan. Jumys qorytyndysy boıynsha, bas súıek Keıkiniki ekendigi dáleldendi. Biraq soǵan qaramastan tıisti DNQ-saraptama jasalady. Bul týraly Ortalyq komýnıkasıalar qyzmetinde ótken baspasóz máslıhatynda vedomstvo vıse-mınıstri Aqtoty Raıymqulova málimdedi,- dep habarlaıdy Qamshy.kz Baq.kz-ke silteme jasap.

«Mádenıet mınıstrligi osy máselege qatysty arnaıy jumys tobyn qurdy. Onyń quramyna ǵalymdar, mýzeı qyzmetkerleri, arheologtar, antropologtar kirdi. Olar tıisti zertteý jumysyn júrgizdi. Zertteý jumysyna sáıkes, bul Keıki batyrdyń basy ekendigin senimdi túrde aıtýǵa bolady. Biraq soǵan qaramastan DNQ-saraptama jasalady. Qazirgi tańda vengrıalyq ǵalymdarmen osy máselege qatysty kelissóz júrgizilýde. Olar zertteý jumysyn qolǵa alýǵa daıyn», - dedi vıse-mınıstr.

Aqtoty Raıymqulova qazaq eliniń tutastyǵy úshin kúresken batyr óz elinde jerlenetindigin atap ótti.

«Halqynyń táýelsizdigi úshin kúresken qazaq batyry óziniń týǵan jerinde jerlenýi qajet. Biz alǵa taǵy bir qadam jasadyq. Men ony úlken qýanyshpen aıta alamyn», - dedi ol.

Sonymen qatar, QR Mádenıet jáne sport vıse-mınıstri aldaǵy ýaqytta Kenesary hannyń bas súıegin ákelý boıynsha tıisti jumystar júrgiziletindigin aıtty.

«Kenesary hanǵa da qatysty jumystar júrgizilýde. Bul bir kúnniń sharýasy emes. Osy baǵyt boıynsha jumys júrgizetin bolamyz. Onyń nátıjesi de osyndaı bolady degen úmittemin», - dep túıindedi sózin A.Raıymqulova.