Keshe Prezıdent Jarlyǵymen qorǵanys jáne aeroǵarysh ónerkásibi mınıstrligi quryldy. Qazaq tilindegi ataýyna qarap burynǵy qorǵanys mınıstrligi taratylypty dep túsinip jatqandar da bar. Jańa mınıstrlikke buryn qorǵanys mınıstrliginiń quzyrynda bolyp kelgen qorǵanys ónerkásibi, ıaǵnı, qarý-jaraq, oq-dári shyǵarý, áskerı tehnıkalardy qurastyrý máseleleri berilse, 2014 jylǵy Úkimettegi qurylymdyq ózgeristerden soń mı qoıyrtpaq bolyp ketken «MIR» - Investısıalar jáne damý mınıstrliginen ǵarysh qyzmeti salasyndaǵy ókilettikter berildi. Olardan bólek, Ulttyq ekonomıka, aqparat jáne komýnıkasıa mınıstrlikteriniń, Úkimet keńsesiniń qaramaǵyndaǵy da biraz qyzmetter jańa mınıstrlikke ótedi.
Endi prezıdenttiń jańa mınıstrlik qurýyna ne sebep boldy degen suraq tóńireginde oılansaq. Aldymen memleket qaýipsizdiginiń kepili, qýatty armıanyń senimdi tyly sanalatyn qorǵanys ónerkásibinen bastaıyq. Osy ýaqytqa deıin qorǵanys mınıstrliginde áshkerelengen jemqorlyq qylmystardyń deni osy qarý-jaraq, oq-dári jáne áskerı tehnıka satyp alý, jóndetý jumystarynyń aınalasynda oryn aldy. Ataqty Ásenov isin, onyń aldyndaǵy Izraılde qurastyryldy delingen zeńbirek-zymyrandardy eske alyńyz. Tamyz aıynda qolǵa túsken mınıstrliktiń materıaldyq-tehnıkalyq qamtamasyz etý bas basqarmasynyń shendileri de biraz qıturqylyqtyń basyn qaıyrǵan sıaqty.
Demek, qorǵanys ónerkásibine osynsha mańyz berip, bul salany retteýshi organdy mınıstrlik deńgeıine kóterýdegi basty maqsat ta osy jemqorlyqqa jol beretin tetikterdi joıyp, áskerdi kerekti qarý-jaraqpen qamtamasyz etýdiń jańa júıesin qurý bolsa kerek. Odan bólek, sońǵy jyldary áskerı kólikter qurastyrý, áskerı tehnıkalardy jóndeýmen aınalysatyn kásiporyndar, tipti patron zaýytyna deıin ashylyp jatqanyn eskersek, bul baǵytta uıymdastyrý turǵysynan da qyrýar jumys kútip tur.
Al, aeroǵarysh salasyna kelsek, álemge tanymal «Baıqońyrdaı» ǵarysh aılaǵymyz bola tura, ǵaryshta qaryshtap damyp kettik deı almaımyz. Osy kúnge deıin aeroǵarysh salasynyń birde agenttik, birde komıtet bolyp, derbes basqarý organynyń qurylmaı kelýi de sonyń aıǵaǵy. Ǵarysh keńistigine jiberilgennen soń habarsyz ketken «Qazsat-1» jobasynan keıin-aq bul salaǵa tıisti kóńil bólinýi kerek edi. Ázirge, ǵaryshta da, jerde de aýyz toltyryp aıtatyn nátıje joq sıaqty («OtaýTV» júıesin aıtpasa). Jańa mınıstrlikti qurýdaǵy taǵy bir sebep Investısıalar jáne damý mınıstrliginiń jumys júktemesin azaıtý bolsa kerek. 2014 jyly mınıstrlikter men túrli agenttikter biriktirilip, Úkimet «yqshamdalǵanda» bul mınıstrlik quramyna birneshe salalyq komıtetter, tipti, tótenshe jaǵdaılar mınıstrliginde bolǵan qyzmetterge deıin kirip ketken bolatyn. Mine, jańa da «jas» mınıstr Jeńis Qasymbekti basy artyq sharýadan arashalap, basty nazaryn tikeleı mindeti ınvestısıa tartý men damý jobalaryn júzege asyrýǵa baǵyttaý kózdelgen sıaqty nemese mınıstrdiń ózi prezıdenttiń janynda júrgen jaqyny arqyly Elbasyǵa osyndaı usynys engizip jiberýi de múmkin.
Jańa mınıstrliktiń tizgini ázirge kimge tapsyrylatyny belgisiz. Ádette prezıdent jańa mınıstrlik qurǵanda onyń basshysy kim bolǵany da habarlanyp jatatyn. Mınıstr portfelin kim ustasa da ókpeleıtin oryn emes. Eki úlken salany basqarady, memlektten bólinetin qarjy da az emes. Ebin tapsa, bir-birin aıaýsyz qyryp jatqan arab elderi bar, antıterrorıstik operasıalar biriktirgen túrli koalısıalar bar, halyqaralyq zańnama aıasynda qarý satyp ta kúneltýge bolady degendeı. Investısıalar jáne damý mınısrligi quramyndaǵy ónerkásip, aeroǵarysh salasyn birinshi vıse-mınıstr Albert Raý basqaryp kelgen. Bálkim jańa qurylǵan ónerkásip mınıstrligin órge súıreýdi elbasy Raýǵa tapsyrar, bálkim qorǵanys mınıstrliginen bireý keler. Ony jaqynda biletin bolamyz.
Darhan Muqantegi
