Óskemendik otbasy halyqaralyq baǵdarlamamen shetel asqan uldaryn tappaı qaldy. AQSH-taǵy eń bedeldi ýnıversıtetke 2007 jyly túsken Erjan Elikov oqýyn bitiretin jyly elge oralmaǵan.
Erjan elge oralýyna eki aı qalǵanda, AQSH-ta iz-tússiz joǵalyp ketipti,- dep habarlaıdy Qamshy.kz KTK arnasyna silteme jasap.
"Sońǵy ret ol maǵan 2011 jyly telefon soqty. Meni 8 naýryz merekesimen quttyqtaǵan bolatyn. Sodan beri ulymnan habar joq. Jazbaǵan jerimiz, kirmegen esigimiz qalmady. Biraq birde-bir memlekettik organ ulymdy taýyp berýge kúsh salyp jatqan joq", - deıdi Erjannyń anasy Záınıa Elikova.
Qazir 28 jasqa tolǵan Erjan tórt jyl boıynda úıine úzdiksiz qońyraý shalyp otyrypty. Jazǵy demalys saıyn da elge kelip júrgen. Sondyqtan telefony sónip qalǵanda, ata-anasy onsha kúdiktene qoımady. Biraq elge oralatyn ýaqyty jaqyndaǵan stýdent sol boıy joǵalǵan. Ýnıversıteti de izdemegen. Qaıta qatyspady dep ony syrttaı oqýdan shyǵaryp jiberipti. «Bolashaqtaǵylar» da baılanysqa shyqpaǵan stýdentke júrdim-bardym qarap stıpendıasynan aıyryp qoıa salǵan.
"Kúıeýim kúdiktenip, birden Astanaǵa jol tartty. Balany «Bolashaqtyń» keńsesinen baryp surady. Biraq ondaǵylar jaýap bere almady. Bilip beremiz dedi de, balanyń qaıda ekenin sol kúıi aıtpady", - deıdi Erjannyń anasy Záınıa Elikova.
«Bolashaqpen» ketken Erjannyń joǵalǵanyna osymen besinshi jyl. Jalǵyzynan kóz jazyp qalǵan ákeniń jazbaǵan jeri qalmaǵan. Artynan AQSH-qa ózi izdep baraıyn dese, qaltalarynda qarjy joq. Qarapaıym metalýrgtyń tapqan tabysy, shetel asýǵa jetpeıdi. Odan qaldy otbasy qazir dalada qalǵan. Óıtkeni jalǵyz páterin «Bolashaqtaǵylar» oqýdyń ótemaqysy retinde sot arqyly tartyp alǵan.
Taǵy 20 mıllıon teńge qaryz artyp qoıǵan. Biraq Elikovter otbasy baspanasyn alǵan «Bolashaq» bárinen buryn balamyzdy qaıtarsa deıdi.
«Bolashaq» baǵdarlamasyn uıymdastyrýshylar balamdy qaıtarýy tıis. Shetelge jibergen soń bas-kóz bolý kerek emes pe? Bes jyl boldy, jaýap joq. Stýdentti izdeýdiń ornyna, sot arqyly oqý aqysyn óndirip aldy", - deıdi Erjannyń ákesi Serik Elikov.
Biraq, balanyń taǵdyryna alańdaǵan «Bolashaq» joq. Álemdegi 20-dan astam memleketke jyl saıyn myńdaǵan qyz-jigitti jóneltetin mekeme Erjan endi bizdiń stýdent emes dep jaıbaraqat otyr.
"Erjan Elikov oqý úlgerimi nasharlaǵan soń, stıpendıasynan aıyryldy. Qazir ol bizdiń stýdent emes. Qazir biz olarǵa sot arqyly qalǵan qarjyny óteý týraly eskertý qaǵazyn jiberdik. Onyń joǵalyp ketkenine bizdiń qatysymyz joq", - deıdi «Bolashaq» Halyqaralyq baǵdarlamalar ortalyǵy AQ vıse-prezıdenti Meıirjan Alpysbaı.
Al anasy jylaı-jylaı kózdiń jasyn taýysqan. Birneshe respýblıkalyq olımpıadalardyń júldegeri, qazaq-túrik lıseıiniń úzdigi Erjan 18 jasynda Almatydaǵy zańgerler akademıasyna grantqa túsipti. Sodan birden «Bolashaqqa» barǵan. Qazaq balasy Pensılvanıa shtatyndaǵy eń bedeldi ýnıversıtette sanaýly granttyń ıegeri atanypty. Endi ne óli, ne tirisin eshkim bilmeı otyr.
