Qazaqstannyń Aqparat jáne komýnıkasıalar mınıstri Dáýren Abaev buqaralyq aqparat quraldarynyń qyzmetin úılestirý jónindegi zańnamalarǵa engizilgeli jatqan ózgertýler men tolyqtyrýlar, osy máselege qatysty qoǵamda talqylanyp jatqan jaǵdaılarǵa qatysty pikir bildirdi, - dep habarlaıdy Qamshy.kz.

Mınıstr osy máselege qatysty oıyn Feısbýktegi paraqshasynda jarıalady.

«Eki apta buryn «Ashyq normatıvtik quqyqtyq aktiler» portalyna «Aqparat jáne komýnıkasıalar máseleleri boıynsha Qazaqstan Respýblıkasynyń keıbir zańnamalyq aktilerine tolyqtyrýlar men ózgertýler engizý týraly» zań jobasyna qatysty Tujyrymdamany ornalastyrǵanymyzdy bilesizder.
Bul osy salany damytýdyń kókeıkesti máseleleri boıynsha ózara pikir, ıdeıa almasý úshin jasalǵan qadam bolatyn», - degen mınıstr zań jobasyn talqylaý qoǵamnyń barlyq múddeli toptarynyń usynys-pikirleri negizinde júzege asatynyn aıtady.

«Árıne, jan-jaqty dıalog atalǵan zań jobasy naqty mehanızmderimen nazarlaryńyzǵa usynylǵan kezde bastalady. Degenmen, kórip otyrǵanymyzdaı, osy alǵashqy kezeńniń ózinde qoǵam men medıa qaýymdastyqty alańdatatyn negizgi máseleler belgili bolýda.
Máselen, blogerler mártebesine ózgertý engizý usynysy qoǵamda qyzý talqylanyp jatyr. Sondyqtan, dál osy máseleniń mán-jaıyna toqtala ketsem deımin», - deıdi D. Abaev.

Osy oraıda mınıstr memlekettiń áleýmettik jeli qoldanýshylaryn qatań baqylaýǵa alýdy maqsat etip otyrmaǵanyn aıtady.

«Bul jerde kózdelgeni otandyq blogosferaǵa qatań baqylaý ornatý emes. Óz basym, mundaı áreket qoǵam úshin tıimsiz dep sanaımyn. Biz tujyrymdamada áleýmettik jeliniń belsendi qoldanýshylaryna óz qalaýymen jelilik basylym retinde tirkeýge turý múmkindigin berýdi usynyp otyrmyz. Iaǵnı, bul degenimiz olarǵa jańa múmkindik pen quqyq beriledi degen sóz.
Árıne, tujyrymdamaǵa qatysty qoǵamdyq pikirtalastyń jandanýy ýákiletti organ retinde bizdi tek qýantady. Mınıstrlik syndarly usynystardy, onyń ishinde synı pikirlerdi de eskeretin bolady», - deıdi mınıstr.
Onyń aıtýynsha, «Ashyq NQA» portaly arqyly atalǵan máselege qatysty árkim óz usynystaryn joldaı alatyn kórinedi.