Aqtaýda alty jasar qyzdy aıaýsyz zorlaǵan er adamnyń aqyl-esi ornynda dep tanylǵan. Kúdikti týraly tyń aqparattar belgili boldy. Bul týraly "31 arnaǵa" silteme jasap Qamshy.kz  habarlaıdy.

Balany zorlady degen kúdikpen qamaýǵa alynǵan er adamnyń ózi zorlyq qurbandarynyń biri deıdi onyń qorǵaýshysy Namıg Velıev. Aıtýynsha, bala kezinde kúdiktige shızofrenıamen syrqat ógeı aǵasy kóp tıisetin. Búginde 32 jastaǵy kúdiktiniń bes jasar uly men áıeli bar. Qamaýǵa alynǵanyna deıin jeke tasymalmen aınalysyp kelgen.

Advokaty kúdikti kameralastarynan qysym kórgendikten, isti moınyna aldy dep otyr. Bul týraly "Astana" arnasy habarlaıdy.

"İsti moınyna almasań, januıańa zábir kórsetemiz dep, qorqytyp úrkitken. Turǵylyqty mekenjaıyn, áıeliniń jumys ornyn, tipti balasynyń qaı balabaqshaǵa baryp júrgenin bilip alypty", - deıdi Namıg Velıev.

Qazir prokýratýraǵa tıisti shaǵym jiberilgen. Kúdiktiniń otbasy táýlik boıy kúzetilýde. Qylmys jasalǵan kúni ol tasymaldaýmen aınalysyp júrgenin aıtqan. İs materıaldaryna sáıkes shynynda kúdikti 1-shi shaǵynaýdanda bolǵan. Bul jerge klıentti ákelip, keıin teńiz jaqqa bet alǵan. Jol boıy dáret syndyrý úshin toqtaǵanyn aıtady.

Al zorlyq kórgen sábı osy jerden tabyldy. Aıyptalýshy teńiz jaqtan klıent otyrǵyzyp, qalaǵa qaıttym dep ant-sý iship otyr. Bul sózderin rastaıyn kýágerler de bar. Kóliginde balanyń bolǵanyn aıǵaqtaıtyn zattar joq. Tek genetıkalyq saraptama barlyǵyn joqqa shyǵaryp otyr. Advokat onyń qorytyndysy burmalanǵan deıdi.

Eske salaıyq, kúdikti zorlyq, adam urlaý jáne kisi ólimine oqtalý baptarymen aıyptalyp otyr. Kinási dáleldense, 25 jyl jaza arqalaýy múmkin.

Al sumdyq oqıǵa 20 tamyz kúni Aqtaýda oryn alǵan. 6 jasar sábıdi áldekimder urlap áketip, azaptap zorlaǵan. Dárigerler onyń ómiri úshin áli kúnge kúresýde. Astanadaǵy ana men bala ortalyǵynda emdelip jatqan sábıdiń hali aýyr.