Úı janýarlarynan juǵatyn aýrýlarǵa qarsy veterınarıalyq sharalar bar ma?

Suraq: Úı janýarlarynan adamǵa juǵatyn asa qaýipti aýrýlarǵa qarsy qandaı veterınarlyq sharalar atqarylýda? Buǵan Shymkent aýyl sharýashylyǵy jáne veterınarıa bólimi basshysynyń orynbasary Tóráli JUBANOV jaýap beredi,-dep habarlaıdy QAMSHY.KZ 

Tóráli JUBANOV, aýyl sharýashylyǵy jáne veterınarıa bólimi basshysynyń orynbasary:

– QR Aýyl sharýashylyǵy mınıstriniń 2015 jylǵy 30 qazandaǵy «Veterınarıa salasyndaǵy normatıvtik-quqyqtyq aktilerdi bekitý týraly» buıryǵyna sáıkes «Profılaktıkasy, dıagnostıkasy jáne joıylýy búdjet qarajaty esebinen júzege asyrylatyn janýarlardyń asa qaýipti aýrýlarynyń tizbesi» bekitilgen. Tizbede janýarlardyń 69 asa qaýipti aýrýlary kórsetilgen. Sonyń ishinde Shymkentte qaýipti aýrýlardyń 15 túrine búdjet qarajaty esebinen ekpe jasalsa, 25 túrine dıagnostıkalyq zertteýler júrgiziledi. Olar: qutyrma, brýselez, aýeskı aýrýy, leıkoz, leptospıroz, lısterıoz, pasterellez, topalań, týberkýlez, aýsyl, kúl, ınfeksıalyq anemıa, qarasan, qoıdyń juqpaly epıdıdımıti, bradzot sekildi keselder.

Osynyń ishinde adamdardyń jıi shaldyǵatyny, emi sozylmaly túrde ótetini – brýselez aýrýy. Bıyl bul keseldi anyqtaý úshin 20864 iri qara mal, 36985 ýaq mal zerttelip, 24 iri qara mal men 69 ýaq maldan brýselezdiń belgileri anyqtaldy. Aýrý maldar arnaıy mal soıý beketinde sanıtarlyq ádispen óńdeýge jiberildi.

 B.DARǴOJINA     okg.kz