Túrikten túrpideı jıyrylamyz. Uıǵyr dese yrshyp túsemiz. Ózbekten ólerdeı qashamyz. Qyrǵyzdy qyr asyramyz. Qaraqalpaq qas dushpannan ary. Tatar tulǵa emes. Bashqurt pen noǵaı quldan tómen. Arab týraly aıtpaǵanymyz abzal. Biz nege ondaımyz? Sonda bizge kim dos? Álde, ǵasyrlar boıy Eýrazıa kindiginde erkin jorytqan ata-baba qaǵanatynyń shańyraǵyn ortasyna túsirgen orys dos pa? Altyn Ordany ydyratyp, usaq handyqtardy bir-birine aıdap salyp talqandaǵan Reseı ımperıasy - túrki tildes memleketterdiń basyn ómir-baqı qospaýdyń amalyn áli júrgizip keledi. Óte sátti saıasat. Sibir handyǵyn, Altyn Orda astanasy Saraıshyqty, Qazandy, Qajy-Tarhandy, Qyrymdy da dál osyndaı qıturqy, ekijúzdi saıasatpen jer betinen joq etti. Qaıtadan turmastaı týa shóktirdi. Ózimizdiń jonymyzdan kesip jasaǵan qarǵybaýdy moınymyzǵa myqtap salyp, aıtqanyna júrgizdi. Qajet kezinde qandas-baýyrlarymyzǵa qarsy ıt bolyp úrgizdi. Áli úrip kelemiz. Biraq qazir moınymyzda burynǵydaı qarǵybaý joq. Alla saqtasyn, erteń Ýkraınadaǵydaı synaq bizdiń de basymyzǵa týsa - uıǵyr men túrik, ózbek pen tatar kimniń sózin sóıleıdi? Baýyryń baýyryna alyp týlasa qaıtemiz? Shettetip, kózge shuqyǵannan qazir bizdegi uıǵyr men túrik, tatar men noǵaı qazaqsha sálemdespeıdi. Barynsha oryssha shúldireýge beıim. Tek, ózbek pen qyrǵyz ǵana búıregin buryp turady. Bir jeńnen qol, bir jaǵadan bas shyǵarý úshin - san ǵasyrlar buryn enshi bólisken aǵaıyndarymyzdy qaıta baýyrǵa tartaıyq. Ózge elde ekendikterin eske salyp, ógeısitpeıik. Sonda biz 10 mıllıon emes, 15 mıllıondyq jaý ala almas tas qamalǵa aınalamyz. Dosyń kim seniń?