Aqyndar aıtysynyń qazirgi jaı-japsary týraly aıtqan Rınat Zaıytov  áriptesterin «senarıden shyǵa almaı qaldy» dep aıyptaıdy. Aıtystyń sapasy álsirep bara jatqanyn moıyndaǵan aqyndar onyń basqa sebebi baryn aıtady, - dep habarlaıdy Qamshy.kz Azattyqqa cilteme jasap. 

Aıtysker aqyn Rınat Zaıytov «1980 jyldary bolmaǵan senzýra búgingi aıtysta bar» dep alańdaıdy.

– Búgingi aıtysta uıymdastyrýshylardyń nemese bireýdiń kóńiline jaqpaıtyn sóz aıtsań, ertesinde jınalysqa salady ne «kelesi aıtysqa qatystyrmaımyz» dep qorqytady, – dedi ol ótken aptada almatylyq stýdentterge «Búgingi aıtys» taqyrybynda oqyǵan qoǵamdyq leksıasynda.

Aıtys ónerin «qaı zamannan beri táýelsiz, óz qoǵamynyń kemshilikterin, jetistikterin, indetterin aıtatyn orta bolǵan» dep sıpattaǵan Rınat Zaıytov qazirgi aıtyskerlerdi «aldyn ala belgilengen senarı boıynsha jyrlap shyǵady» dep aıyptady.

– Aıtystyń búgingi eń basty qasireti – aqynnyń jeke ustamy bolmaýy, aıtystaǵy oılardy bireýdiń qadaǵalap otyrýy, aıtystaǵy aıtylǵan pikirlerge qarsy sahnanyń syrtyna shyǵyp ózge bireýlerdiń pikirlerin aıtýy. «El alyp jatqan kólikti men nege almaımyn» degen oımen aqıqat úshin emes, dúnıe úshin aıtysatyn aqyndar kóbeıip ketti, – deıdi Rınat Zaıytov.

Ol «aıtyskerler uıymdastyrýshylardyń yqpalynan shyǵa almaı, osy betimen kete berse, bes jyldan keıin úsh myń oryndyqty saraıda úsh júz adam otyratyn deńgeıge jetemiz» dep qaýiptenedi.