Sozaq aýdanynda búgingi tańda mal sharýashylyǵymen aınalysatyn sharýa qojalyqtarynyń bári etti qoı túrlerin ósirýmen qarqyndy túrde aınalysýda.  Sebebi, eti de, terisi de baǵaly qoı úlken suranysqa ıe ekeni aıtpasa da túsinikti. Qarakól sharýashylyǵy - elimizdiń shól jáne shóleıitti aımaqtarynyń ekonomıkasynda erekshe oryn alatyn Qazaqstannyń qoı sharýashylyǵyndaǵy keleshegi mol salanyń biri. Onyń basty ónimi estetıkalyq jaǵynan qundy bolyp esepteletin qarakól eltirisi, sondaı-aq qoı eti, iri talshyqty jún óndirý bolyp tabylady. Al bul qoı tuqymy uzaq qashyqtyqta jaıyla alady (táýligine 10-15 shaqyrymǵa), ishilgen sýdyń joǵary mıneraldanýyn jáne aýa temperatýrasynyń kúrt aýytqýyn jaqsy kóteredi.Onyń ústine qarakól qoıy tuqymy álemdegi erteden kele jatqan mal tuqymdarynyń biri bolyp tabylady.

Sondyqtan, bul qoı tuqymyn saqtaý jáne onyń basyn kóbeıtý shóldi-shóleıtti aımaqtar úshin óte qajet.

Al sala mamandary kózin tapsa, qarakól sharýashylyǵynan keler tabystyń kól-kósir bolatynyn aıtady.

Osy baǵyttaǵy jumystardy jandandyrǵan teriskeılikterdiń qarakól mal sharýashylyǵyn damytý jónindegi jumystary óz nátıjesin bere bastady. Búginde Sozaq aýdanynda eki birdeı sharýashylyq – «Qumkent» jáne «Qaraqur» óndiristik kooperatıvi qarakól qoıyn ósirýmen aınalysady. 

Tamyz aıynda «Qaraqur» óndiristik kooperatıvi 1238 bas qarakól toqtysyn Birikken Arab Ámirlikterine eksportqa shyǵaryp, tıimdi baǵada satty. Sheteldikterdiń qoı alýdaǵy talaptarynan tolyqtaı shyqqan kooperatıv jetekshisi jyl sońyna deıin taǵy da birqatar qarakól qoıyn shetelge satýdy josparlap otyrǵanyn aıtady.

«Ońtústik Qazaqstan». http://okg.kz/