Elimizde sońǵy jyldary mal sharýashylyǵyna úlken kóńil bóline bastady Máselen, osy salany órkendetýge baılanysty «Agrobıznes – 2020» baǵdarlamasy qabyldandy. Munan ózge de kóptegen baǵdarlamalar qolǵa alynýda. Bulardy is júzine asyrýda ǵylymı mekemelerdiń de róli zor.

Búginde Qazaq mal sharýashylyǵy jáne mal azyǵy óndirisi ǵylymı-zertteý ınstıtýty men Ońtústik-Batys mal jáne ósimdik sharýashylyǵy ǵylymı-zertteý ınstıtýtynyń ǵalymdary osy baǵytta jumystar júrgizýde. Oblys ákimdigindegi kezekti jıynda eti juǵymdy, terisi baǵaly qarakól sharýashylyǵyn damytý joldary talqylandy. 

– Mal sharýashylyǵyn órkendetý baǵytynda Qazaqstanda etti, sútti iri qara mal, jylqy sharýashylyqtary boıynsha palatalar bar. Qazaqstan jeri qoı ósirýge óte tıimdi bolǵandyqtan, qoı sharýashylyǵy palatasy qurylǵan, – dedi Qazaq mal sharýashylyǵy jáne mal azyǵy óndirisi ǵylymı-zertteý ınstıtýtynyń bas dırektory Ábdirahman Ombaev. – Endi búgingi jıynnyń maqsaty – qarakól sharýashylyǵy boıynsha palataǵa birigý. Buryndary bes-alty oblys tikeleı qarakól sharýashylyǵymen aınalysqan. Osy oblystardy qamtyp, jaıylymyn qarakól sharýashylyǵyna paıdalaný baǵytyndaǵy jumystar jasalýy tıis. Qarakól qoıy shóldi, shóleıtti aımaqqa jaqsy beıimdelgen. Kúnine 20-30 shaqyrymǵa deıin jaıylyp, ózine kerekti qoregin taýyp jeıdi.

Kezinde Ońtústik-Batys  mal jáne ósimdik sharýashylyǵy ǵylymı-zertteý ınstıtýtynyń ǵalymdary 17 túrli qarakól tústerin shyǵarǵan eken. Osy tektik qor áli de saqtalýda. Jýyrda Sozaq aýdanynda 1200 bas qarakól qoıy Birikken Arab Ámirlikterine tıimdi baǵada satyldy. Qajylyq kezinde maıy az, eti basym bul qoıdyń etine degen suranys joǵarylaıtyn kórinedi.

            Baıan DARǴOJINA.  «Ońtústik Qazaqstan». http://okg.kz/