Otandyq taýar óndirýshilerdi nasıhattaý maqsatynda Shymkent qalasyndaǵy «Kórme» ortalyǵynda «Ontustik ónimderi—2016» kórme-jármeńkesi ótti. Onda 150-den astam jergilikti kompanıa tamaq, farmasevtıka, mashına jasaý, hımıa, jeńil jáne qurylys ónerkásibi salalary boıynsha óz ónimderin kelýshiler nazaryna usyndy.
Kórme-jármeńkeniń ótýine «Kazbrends», «Rixos Khadisha Shymkent», «Canvashotelshymkent», «Shymkent Grand Hotel», Almaty Management University «Araı de lúks», «Rahıma plaza» sekildi bıznes uıymdar atsalysty.
Bıylǵy kórmeniń ereksheligi sol, oǵan «VızIT», «Bal tekstıl», «Nazar tekstıl», «Karlskrona», «Standart sement», «Ordabasy qus», «Shymkent qus», «Barys—2007», «Golden Nomad» tárizdi iri kásiporyndarmen birge «Amfa Global», «Baby Plast», «Sofı» sıaqty jańadan ashylǵan kompanıalar da qatysty.
Kórmeniń jumysymen tanysýǵa kelgen oblys ákimi B.Atamqulov otandyq taýar óndirýshilerdiń ónimin tamashalap, atalǵan sharany uıymdastyrǵan OQO kásipkerler palatasyna alǵysyn bildirdi.
— «Ońtústik ónimi» degende qazaqstandyqtar kóz alddaryna «joǵary sapa» men «tıimdi baǵany» elestetýi tıis. Sol úshin jergilikti kompanıalardy eń aldymen ónimderiniń sapasyna, baǵasynyń tıimdiligine kóńil bólýge shaqyramyn. Osy eki talaptyń údesinen shyǵa bilsek, Ońtústiktiń ónimi ishki jáne syrtqy naryqta óz ornyn eshýaqytta joǵaltpaıdy, —dedi ol.
Shara barysynda «Qazaqstannyń úzdik taýary» atty óńirlik kórme-baıqaýy uıymdastyryldy. Nátıjesinde, «Halyq úshin úzdik taýar», «Óndiristik baǵyttaǵy úzdik taýar» jáne «Úzdik azyq-túlik taýary» nomınasıalary boıynsha jeńimpazdar anyqtaldy. Alǵashqy atalymda birinshi oryndy «Azala tekstıl» JSHS jeńip alsa, ekinshi oryn «Álem BT» JSHS, úshinshi oryn «Nazar tekstıl» JSHS-ne buıyrdy. Al, «Karlskrona» JSHS óndiristik baǵyttaǵy eń úzdik kásiporyn atansa, osy nomınasıadaǵy ekinshi, úshinshi oryndar «Trıýmf» pen «Batsý Vodokanal» JSHS-lerine berildi. Sondaı-aq, eń sońǵy atalym boıynsha birinshi dárejeli dıplommen «Barys—2007» JSHS marapattalsa, «Amangeldi» JSHS ekinshi, al, «Ladýshkı» JSHS úshinshi orynnan kórindi.
Osy baıqaýda jeńimpaz atanǵandar Astanada ótetin respýblıkalyq «Qazaqstannyń úzdik taýary» kórme-konkýrsyna qatysatyn bolady.
Sonymen birge, «Halyq tańdaýy», «Jyldyń serpini», «Jyldyń brendi», «Áleýmettik mańyzdy startap» nomınasıalary boıynsha da júldegerler marapattaldy.
Ánýar JUMASHBAEV, «Ońtústik Qazaqstan».
